Mektepke jol: Elordada 100 balaǵa oqý quraldary men aqshalaı kómek berildi

ASTANA. QazAqparat – Astanada «Mektepke jol» respýblıkalyq aktsııasy ótip jatyr. Búgin shara aıasynda 100 oqýshy oqý quraldary men aqsha sertıfıkatyn aldy, dep habarlaıdy QazAqparat tilshisi.

«Qazaqstan halqy Assambleıasy qalalyq ákimdikpen birlese otyryp «Mektepke jol» aktsııasyn uıymdastyrdyq. Respýblıkalyq aktsııaǵa jyl saıyn qatysyp kelemiz. Balalardyń tizimin bizge ákimdik berdi. Aktsııaǵa kelsek, ár balaǵa rıýkzak berdik, onyń ishinde oqý quraldary bar. Sonymen qatar ár balaǵa 30 myń teńgeniń sertıfıkaty tabys etildi. Bári - az qamtylǵan, jaǵdaıy tómen otbasy balalary», - dedi Qazaqstan halqy Assambleıasy tóraǵasynyń orynbasary Akbarjan Ismaılov.

Oqýshylarǵa kómek Qazaqstan halqy Assambleıasy, elorda ákimdigi jáne tájikterdiń respýblıkalyq etnomádenı ortalyǵynyń uıytqy bolýymen uıymdastyryldy.

«5 balam bar, onyń ishinde tórteýi - oqýshy. Tórt balama rıýkzak pen sertıfıkat berdi. Búgingi shara týraly Almaty aýdandyq ákimdigi habarlap aıtty. Aýdan ákimdigine alǵysymdy aıtamyn, únemi osy sekildi is-sharalarǵa shaqyryp otyrady», - dedi kópbalaly ana Nurgúl.