Mektepke oralatyndaryńa senimdimin – Tamara Dúısenova aýyr dertke shaldyqqan balalardy Bilim kúnimen quttyqtady

ASTANA. QazAqparat - Jańa oqý jylyna oraı QR Premer-Mınıstriniń orynbasary – Eńbek jáne halyqty áleýmettik qorǵaý mınıstri Tamara Dúısenova UMC Ana men bala ortalyǵyna baryp, em alyp jatqan balalardy Bilim kúnimen quttyqtady, dep habarlaıdy QazAqparat University Medical Center baspasóz qyzmetine silteme jasaı otyryp.

«Búgin úsh mıllıon bala mektepke bardy. Dertpen kúresip júrip, jigeri bar, oqýǵa qushtar osyndaı balalar baryn maqtan etemin, barlyqtaryń da oqý ozaty bolatyndaryńa, óz mektepterińe qaıta oralatyndaryńa senimdimin. Sendermen aldaǵy ýaqytta kezdesken kezde, árqaısysyń jeńimpaz ekenderińdi biletin bolamyn. Barlyq salada da jeńimpazsyńdar!», - dedi Tamara Dúısenova balalardy quttyqtaı otyryp.

Qazirgi ýaqytta Ortalyqta kóptegen balalar statsıonarlyq em qabyldap jatyr, solardyń arasynda onkogematologııalyq aýrýǵa shaldyqqan naýqastar, dıalızdik em qabyldaıtyn jáne aǵza transplantatsııasynan keıingi balalar bar.

Qazaqstanda onkologııalyq aýrýlarǵa shaldyqqan 4400 bala esepte tur. Olardyń kópshiligi aýyr deńgeıdegi leıkozben aýyrady. Bizdiń elimizde joǵary dozaly hımııalyq terapııa, targetti ımmýndyq terapııa, súıekter men býyndardy endoprotezdeý, súıek kemigin aýtotransplantatsııalaý sııaqty onkologııalyq aýrýlardy emdeýdiń jańa ádisteri zerttelip, tájirıbede qoldanylyp keledi. 2012 jyldyń sáýirinen bastap UMC-de alǵash ret súıek kemigin allogendik transplantatsııalaý bastaldy.

«Eń aldymen Bilim kúnimen quttyqtaımyn! Bul ár adamnyń ómirindegi mańyzdy kezeń. Búginde adamzat ataýly qol jetkizgen ár tehnologııa men bilimdi osy jerde tájirıbege engizetin bolamyz. Dál qazir osy jerde turǵan balalar bolashaqta armandaryna jetsin. Bireýlerińiz bul jerde professor, doktor nemese klınıkanyń basqa da bir mamany retinde de keletin kúnge jetkende, búgingi kúndi kúlip eske alatyn bolaıyq», - dep atap ótti UMC Basqarma tóraǵasy ıÝrıı Pıa.

Balalar klınıkada uzaq ýaqyt boıy emdelýine baılanysty, UMC Ana men bala ortalyǵynda negizgi pánder boıynsha mektep jasyndaǵy balalarǵa arnalǵan sabaqtar ótkiziletin arnaıy oqý synyby bar. Ortasha eseppen jylyna 146 bala Ortalyq qabyrǵalarynda bilim alady.

QR Oqý-aǵartý mınıstrliginiń baǵdarlamasyna sáıkes, oqýshylardyń alǵan baǵalary mektepterge jiberiledi jáne toqsandy/synypty bitirip, bilim alǵany týraly sáıkes qujat ala alady.

Tamara Dúısenovanyń UMC Ana men bala ortalyǵynda em alyp jatqan balalarmen jáne klınıka basshylyǵymen kezdesýine QR Oqý-aǵartý mınıstri Ǵanı Beısembaev pen Densaýlyq saqtaý vıtse-mınıstri Vıacheslav Dýdnık te qatysty. Bilim kúnine oraı Ortalyq kitaphanasyna mektep oqýlyqtary men kitaptar syıǵa tartyldy. Іs-shara sońynda balalarǵa arnalǵan merekelik jıyn ótti.