Mektepke qarýlanyp kelip, balalardy jaraqattaǵan oqýshy psıhıatrııalyq esepte turǵan - prokýratýra

PETROPAVL. QazAqparat – Petropavlda 3 oqýshyny pyshaq, baltamen jaraqattaǵan 9-synyp oqýshysy ustaldy. «Adam óltirýge oqtalý» boıynsha sotqa deıingi tergeý bastaldy, dep habarlaıdy QazAqparat tilshisi.

Soltústik Qazaqstan oblystyq bilim basqarmasynyń basshysy Názir Jáshibekovtiń aıtýynsha, 9-synyp oqýshysy aldyn ala boljam boıynsha, mektepke balta men pyshaqty sómkesine jasyryp ákelgen.

«Eshkim oqýshynyń sómkesin teksere almaıdy, quqy joq. Keıin dárethanaǵa kirip, odan qarýlanyp shyqqan. Zardap shekkender 9-shy jáne 10-synyp oqýshylary. Eki ul jáne bir qyz bala.

Eki balanyń jaǵdaıy qalypty, oblystyq balalar aýrýhanasynda jatyr», - deıdi Názir Jáshibekov.

SQO prokýratýrasy jáne polıtsııa departamenti osy oqys oqıǵaǵa qatysty túsinik berdi.

«13 aqpan kúni Petropavldaǵy 4-orta mektepte 9-synyp oqýshysy osy bilim ordasynyń úsh oqýshysyna dene jaraqatyn saldy. Balalar aman, oblystyq balalar aýrýhanasyna jetkizildi, esin biledi.

Kámeletke tolmaǵan D.-ny polıtsııa qyzmetkerleri ustady. Osy derekke qatysty «adam óltirýge oqtalý» boıynsha sotqa deıingi tergeý bastaldy.

Aldyn ala málimet boıynsha, kámelet jasyna tolmaǵan D. psıhıatrııalyq esepte tur.

Jasóspirimniń jáne mektep ákimshiliginiń áreketine sotqa deıingi tergeý barysynda quqyqtyq baǵa beriletin bolady. Qalǵan mán-jaı anyqtalyp jatyr», - delingen habarlamada.

Buǵan deıin Petropavldaǵy 4-orta mektepte 9-synyp oqýshysynyń mektepke balta men pyshaq ákelip, úsh balany jaralaǵany týraly aıtqan edik.