Mektepke deıingi uıym qyzmetkerleri tárbıe berýdiń ınnovatsııalyq ádisterin zerdeleýde
Jıynǵa Qazaqstannyń mektepke deıingi bilim berý salasyndaǵy jetekshi mamandary, sarapshylary men ǵalymdary tájirıbe almasý jáne balalardy oqytýdyń ınnovatsııalyq ádisterin talqylaý úshin bas qosty, dep habarlaıdy QazAqparat.
Semınarǵa QR Bilim jáne ǵylym mınıstrliginiń, elordalyq Bilim berýdi jańǵyrtý ortalyǵynyń, «Bóbek» balabaqshasy men respýblıkanyń jetekshi ýnıversıtetteri jáne mektepke deıingi uıymdarynyń ókilderi qatysty.
Semınardy ashqan QR Prezıdenti Іs Basqarmasy medıtsınalyq ortalyǵynyń jetekshisi Alekseı Tsoı: «10 jyl boıy bizdiń pedagogtar halyqaralyq tájirıbeni zerdelep, ony jergilikti jaǵdaıǵa qaraı beıimdedi. Qazir biz jınaǵan bilim men tájirıbemizdi respýblıkanyń balabaqshalarymen bólisýge daıynbyz», - dedi.
«Astana» Halyqaralyq ǵylymı kesheniniń basqarýshy dırektory Serik Irsalıev adamnyń qalyptasýyndaǵy mektepke deıingi bilim berýdiń sheshýshi róline toqtalyp, oǵan tıisti nazar aýdarý qajettigin basa aıtty.
«Qazaqstanda bilim berýdiń árbir deńgeıiniń órkendeýi úshin jaǵdaılar jasalǵan. Orta bilim berý deńgeıinde - «Nazarbaev Zııatkerlik mektepteri» jáne «Daryn» ortalyǵy, kásiptik bilim berýde - «Kásipqor» holdıngi, joǵary bilim berý deńgeıinde - Nazarbaev Ýnıversıteti jáne «Bolashaq» baǵdarlamasy jumys isteýde. Al mektepke deıingi bilim berýde «Qarlyǵash» balabaqshasy osy mıssııany tolyqtaı atqara alady jáne osy saladaǵy eń ozyq damý ortalyǵyna aınalýy tıis», - dedi ol.
Semınar qatysýshylary balalardy oqytýdyń ozyq ádisterimen, sonyń ishinde qazaq tilin úıretýdegi «tildik ortaǵa boılaý ádisi» jáne balalardyń shyǵarmashylyq, synı oılaý, kommýnıkatıvtik jáne komandalyq jumys daǵdylaryn damytýǵa baǵyttalǵan «sıngapýrlyq tehnologııalarymen» tanysty. Qatysýshylar robototehnıka jáne matematıka daǵdylaryn damytýǵa arnalǵan «STEAM tehnologııasynyń» mańyzdylyǵyn atap ótti.
Sonymen birge mektepke deıingi uıymdardy tıimdi basqarý, etnopedagogıka, balabaqshalardy tsıfrlandyrý jáne «Knaıp nemis saýyqtyrý tehnologııalaryna» arnalǵan sheberlik sabaqtary uıymdastyryldy.
Semınar aıasynda QR Prezıdenti Іs Basqarmasy Medıtsınalyq ortalyǵy men «Órleý» BAUO, «Astana» halyqaralyq ǵylymı kesheni jáne Nursultan qalasy gýmanıtarlyq kolledji arasynda ózara áriptestik boıynsha Memorandýmdarǵa qol qoıyldy.
Semınar «Qarlyǵash» balabaqshasynyń biregeı tájirıbesin elimizdiń mektepke deıingi uıymdaryna taratý, oqytýshylardyń biliktiligin jáne elimizdiń mektepke deıingi tárbıe jáne bilim berý sapasyn arttyrý maqsatynda uıymdastyryldy.