Mektep jasyndaǵy balalarǵa arnalǵan mádenı normatıv bekitilmek

ASTANA. QazAqparat - QR Premer-Mınıstriniń orynbasary Altaı Kólginov jaýapty vedomstvoǵa mádenıet saıasatynyń jańa tujyrymdamasyn bekitýge qatysty tapsyrma berdi, dep habarlaıdy QazAqparat tilshisi.

«Mádenıet mınıstrliginiń aldynda birqatar mańyzdy mindet tur. Birinshiden, mádenıet saıasatynyń jańa tujyrymdamasyn bekitýdi jedeldetýimiz qajet. Bul qujat rýhanııat jáne óner salalaryndaǵy máselelerdiń júıeli turǵyda sheshilýine jol ashyp, otandyq kınoǵa, teatrlarǵa, mádenıet oshaqtaryna halyqtyń yqylasyn odan ári arttyrýy tıis. Teatrǵa, mýzeıge, kitaphanaǵa, kórmege jáne basqa da mádenı is-sharaǵa turaqty barýdy dástúrge aınaldyrý basty mindettiń biri. Ol úshin mınıstrlik ákimdiktermen birge óner oshaqtaryn, onyń ishinde teatrlardy qoldaý sharalaryna erekshe nazar aýdarýy tıis», - dedi A. Kólginov Mádenıet mınıstrliginiń alqa májilisinde.

Onyń aıtýynsha, qoǵamda kitap oqýdy dáripteýge zor kóńil bólý qajet. Kitaphanalar qoryn kópshilik arasynda suranysqa ıe otandyq jáne sheteldik jazýshylardyń shyǵarmalarymen tolyqtyrylyp otyry mańyzdy. Suranysqa qaraı kitaphana qoryn elektrondy formatqa kóshirilýin kezeń-kezeńmen qolǵa alý kerek.

«Tujyrymdama aıasynda mektep jasyndaǵy balalarǵa arnalǵan mádenı normatıv bekitilip, óskeleń urpaqty rýhanı qundylyqtarmen sýsyndatýǵa basymdyq berý josparlanyp otyr. Mundaı qadam balalardy jan-jaqty damytýǵa, olardyń shyǵarmashylyq oı-órisin ilgeriletýge jol ashady. Bul mańyzdy bastamany iske asyrý mehanızmderin Oqý-aǵartý mınıstrligimen, ákimdiktermen birge jan-jaqty pysyqtaýdy tapsyramyn», - dedi Úkimet basshysynyń orynbasary.

Onyń sózine qaraǵanda, jalpy tujyrymdamada mádenıet salasynyń damýyna tyń serpin beretin keshendi sharalar qarastyrylýy tıis.

«Mınıstrlik belgilengen tártippen qujat jobasynyń kelisý rásimderin aıaqtap, Úkimet otyrysynda qabyldanýyn qamtamasyz etýi qajet», - dedi Altaı Kólginov.