Mektep tabaldyryǵyn alǵash attaıtyn búldirshinderge test tapsyrý qarastyrylmaǵan - QR BǴM

ASTANA. QazAqparat - Sońǵy kezde jańartylǵan bilim mazmunyna baılanysty kóp talqylaýlar júrgizilip, túrli pikirler aıtyldy. Endi mine QR Bilim jáne ǵylym mınıstrligi jańartylǵan bilim mazmunyn birinshi synypqa engizgeli otyr. QR Bilim jáne ǵylym vıtse-mınıstri Elmıra Sýhanberdıeva mınıstrlik «100 naqty qadam» Ult josparynyń qadamdaryn jáne Bilim men ǵylymdy damytýdyń 2016-2019 jyldarǵa arnalǵan memlekettik baǵdarlamasyn iske asyrý maqsatyndaǵy bilim mazmunyna kezeń-kezeńmen kóshý jumystaryn bastaǵanyn atap ótti.

«Atap aıtqanda, jańa oqý jylynan bastap elimizdiń barlyq mektepterine Nazarbaev Zııatkerlik mektepteriniń tájirıbesi boıynsha jańartylǵan bilim mazmuny birinshi synyptan bastap engiziledi», - dep atap ótti E. Sýhanberdıeva elordada ótken baspasóz máslıhatynda.

Osy rette ol oqýshylardyń fýnktsıonaldyq saýattylyǵyn damytýǵa baǵyttalǵan jańartylǵan mazmun 30 qanatqaqty mektepte synaqtan tabysty ótkenin eske salyp ótti.

Belgili bolǵandaı, jańartylǵan bilim mazmuny arnaıy kestege sáıkes kezeń-kezeńmen engiziledi: 2016  jyly - 1-synyp,  2017 jyly - 2,5,7 synyptar, 2018 jyly - 3,6,8,10-synyptar,  2019  jyly - 4,9,11,12-synyptar. 2020 jylǵa qaraı 12 jyldyq qurylymmen jańartylǵan bilim mazmunyna kóshý barlyq synyptarda aıaqtalady.

Óz kezeginde QR BǴM Mektepke deıingi jáne orta bilim departamentiniń dırektory Jańyl Jontaeva jańa oqý jylynda 410 myń búldirshin mektep tabaldyryǵyn alǵash ret attaıtynyn sóz etti. Osy rette bul balalarǵa jańa mazmun boıynsha bilim alý sáti túsip tur.

«Bıyl birinshi synypqa 410 myńnan astam bala keledi dep kútilýde. Barlyq oblystarda aqparattyq túsindirý jumystary, mektepterdiń daıyndyǵy boıynsha málimetterdi jınaqtaý aıaqtalýda. Búginde mektepter daıyn. Sonymen qatar qazirgi kezde ustazdardy, oqýlyqtardy daıarlaý sharalary júrip jatyr», - dedi departament basshysy.

Qazirgi kezde bilim zańnamasyna sáıkes, tamyzdyń ortasyna qaraı barlyq mektepterge oqýlyqtar jetkiziledi. Osy rette tıisti kelisimsharttar bekitilgen kórinedi.

Budan bólek, departament dırektory birinshi synypqa qabyldanatyn búldirshinderge test nemese emtıhan tapsyrý qarastyrylmaǵanyn atap ótti. «Zańnamaǵa sáıkes, 6-7 jasqa tolǵan balalardy ata-analary mektepke birinshi synypqa aparýǵa quqyly», - dedi ol.

Atap aıtqanda, jalpy bilim berý júıesinde 325 184 pedagog jumys isteıdi. 2016 jyly kýrstardan 91 391 muǵalim, onyń ishinde  bilim mazmunyn jańartý aıasynda 69 097 ustaz ótedi. Úshtildi bilim berýdi engizý kezinde bıyl Nazarbaev Ýnıversıteti men elimizdiń 15 joǵary oqý oryndary bazasynda bıologııa, hımııa, fızıka jáne ınformatıka pánderiniń 675 muǵalimine arnalǵan tórt aılyq kýrstardy ótkizýdi josparlaýda. Bul kýrstardyń maqsaty - oqytýshylar arasynda aǵylshyn tilin jetildirý.

Jalpy biliktilikti arttyrýǵa jyl saıyn 10 mlrd. teńge bólinetin kórinedi. Osy rette barsha muǵalimderge eskerer jaıt, jańartylǵan baǵdarlama boıynsha biliktilikti arttyrý ustazdardyń jeke qarjysyna emes, bıýdjet esebinen júrgiziledi.

Elmıra Sýhanberdıeva 2017-2019 jyldary árbir jyl saıyn 5200 muǵalim aǵylshyn tilinde kýrstarmen qamtylatynyn jetkizdi. Búginde JOO-da muǵalimderdi 12 jyldyq bilim berýdiń jańa mazmunyna sáıkes daıyndaý bastaldy. Osy ýaqytqa deıin 42 joǵary oqý ornynda 18 myńnan astam stýdent úshtildilik baǵdarlamaǵa sáıkes bilim alýda.

Mektepterde 2019 jylǵa josparlanǵan úshtildi bilim berýge kóshý oqý oryndarynyń daıyndyǵyna qaraı iske asyrylmaq. Bul turǵyda shamamen 40 oqýshy bilim alyp jatqan shalǵaıdaǵy eldi mekenderdegi shaǵyn mektepterdiń jaǵdaıy eskerilmek.

«Biz alystaǵy eldi mekendi (bilikti muǵalimdermen) qamtamasyz ete almasaq, onda bul mektepti 2019 jylǵa emes, bir jyl keıin daıyndaımyz. Barlyq qadamdar daıyndyǵyna qaraı iske asyrylady»,-dedi vıtse-mınıstr.