Mektep oqýshylarynyń «Erlik pen Jeńis» taqyrybyndaǵy shyǵarmalar baıqaýy óz máresine jetti

ALMATY. Mamyrdyń 8-i. QazAqparat /Ádilet Musahaev/ - Búgin Almatyda Jeńistiń 65 jyldyǵy men Baýyrjan Momyshulynyń týǵanyna 100 jyl tolýyna oraı uıymdastyrylǵan «Erlik pen Jeńis» taqyrybyndaǵy mektep oqýshylary arasynda ótken shyǵarmalar baıqaýynyń qortyndysy jarııalanyp, jeńimpazdar marapattaldy,

dep habarlaıdy QazAqparat.

Atalmysh baıqaý memlekettik tildi damytý Prezıdenttik qory men «Ulan» balalar gazetiniń uıymdastyrýymen jáne «Beeline» saýda markaly «Kartel» JShS-niń demeýshiligimen ótip otyr.

Memlekettik tildi damytý Prezıdenttik qorynyń dırektory Azat Sháýeev balalar - ana tilimizdiń bolashaǵy degendi aıta kele, «Elimizdiń jas jetkinshekteri qazaqtyń tilin, mádenıetin, ádebıetin súıip, ózimizdiń tól tarıhymyzdy bilip ósýine tárbıeleý bizdiń Qordyń basty mindetteriniń biri. Osy turǵyda biz aqpan aıynda «Ulan» gazetimen birlesip, elimizdegi qazaq mektepteriniń 5-9-shy synyp oqýshylary arasynda osy taqyryp boıynsha prozalyq jáne poezııalyq janyrda baıqaý jarııalaǵan edik», deıdi A.Sháýeev.

Sondaı-aq ol baıqaýǵa elimizdiń túkpir-túpirinen óleń jáne qarasózben jazylǵan 200-den astam shyǵarma kelip túskenin jáne olardyń úzdik degenderi «Ulan» gazetiniń ár sanynda jarııalanyp kelgenin jetkizdi.

Sonymen, qazylar alqasynyń sheshimi boıynsha birinshi oryndy Pavlodar qalasynyń Abaı atyndaǵy mektebiniń 9 synyp oqýshysy Aıdanaq Amantaıqyzy ıelense, ekinshi oryndy Qyzylorda oblysy Qazaly aýdanynyń №216 mektebiniń 9 synyp oqýshysy Altyngúl Sansyzbaı men Shyǵys Qazaqstan oblysy Tarbaǵataı aýdanynyń Q.Aqynov atyndaǵy mektebinen Serik Qantaev ózara bólisti. Al, úshinshi orynǵa Aqtóbe qalasynyń №132 mektebiniń oqýshysy Aqmaral Ertazıeva men Oraldyq Gúljamal Erǵalıeva jáne Almaty qalasynyń №43 mektep oqýshysy Dastan Mádıev laıyq dep tanyldy.

Jeńimpazdar arnaıy maqtaý qaǵazdarymen marapattalyp, «Beeline» saýda markaly «Kartel» JShS-i tarapynan uıaly telefondarǵa ıe boldy.