Mektep oqýshylaryna tegin kómektesetin joba iske qosylady
«NU Alumni» túlekter qaýymdastyǵy bilim berýdegi tálimgerlik boıynsha osyndaı jobany iske qospaq. Joba aıasynda NÝ túlekteri men stýdentteri qatarynan kýratorlar volonterlyq negizde 5-11 synyp oqýshylaryna birqatar pán boıynsha mektep baǵdarlamasyn meńgerýge kómektesedi. Oqýshylardy irikteý kezinde eń aldymen medıtsına qyzmetkerleriniń otbasy múshelerine, sondaı-aq kóp balaly otbasylar men halyqtyń áleýmettik osal toptaryna jatatyn otbasylardan shyqqan balalarǵa basymdyq beriledi.
Jobada oqýshylar pánderdi meńgerýde kómek alyp qana qoımaı, robot tehnıkasy, ınformatıka jáne baǵdarlamalaý boıynsha úıirmelerge jazyla alady.
Sondaı-aq, mentorlarmen birge balalar olımpıadalarǵa daıyndalyp, emtıhandardy, sony ishinde IELTS jáne SAT-ti de tapsyrady.
«Bizdiń joba qazaqstandyq oqýshylardyń álemdik bilim berý keńistigindegi básekege qabilettiligin arttyrýǵa járdemdesý úshin oılastyrylǵan. Búgingi tańda bizdiń jobamyz elordanyń birneshe mektebin ǵana qamtıdy, biraq bolashaqta elimizdiń ár óńirinen kelgen balalardy oqýda qoldaý arqyly onyń geografııasyn keńeıtýdi josparlap otyrmyz», - deıdi «NU Alumni» qoǵamdyq birlestiginiń atqarýshy dırektory Arman Qońqabaı.
Sabaqty oqýshynyń tańdaýyna baılanysty qazaq, aǵylshyn jáne orys tilderinde ótkizý josparlanýda. Ár oqýshy 3 pánge deıin tańdaı alady. Ol boıynsha kýrator apta saıyn 45 mınýttan onlaın-sessııa ótkizedi. Barlyq bilim berý materıaldary: onlaın-sabaqtardyń jazbalary, ádistemelik anyqtamalyqtar, oqýlyqtar, emtıhandarǵa daıyndyq boıynsha usynymdar jobanyń arnaıy saıtynda ornalastyrylady.
Búgingi kúnge deıin jobaǵa irikteýdiń barlyq kezeńinen ótken 69 kýrator-túlek qatysýǵa nıet bildirgen.