Mektep oqýshylary «GENERATIONNEXT» dep atalatyn jýrnal shyǵardy

ASTANA. QazAqparat - Búgin elordada «GENERATIONNEXT» dep atalatyn jasóspirimderge arnalǵan jýrnaldyń tusaýkeser rásimi ótti. Saltanatty sharaǵa QR Aqparat jáne kommýnıkatsııalar mınıstri Dáýren Abaeva arnaıy qatysty, dep habarlaıdy QazAqparat.

«Men shyn júrekten jańa jobalaryńyzǵa sáttilik, tabystar tileımin. Mınıstrlik tarabynan qajetti kómekter kórsetiledi. Bul joba biz úshin birneshe turǵyda barynsha mańyzdy. Birinshiden, bul balalardyń bastamasy jáne biz ony ár ýaqytta da qoldaıtyn bolamyz.  Ekinshiden bul mańyzy zor joba. Ol tanystyrylym barysynda da atalyp ótildi», - dedi mınıstr.

Aıta keterligi, 10-19 jastaǵy jasóspirimderge arnalǵan jýrnaldy elordanyń mektep oqýshylary Alılıa men Ámına Nárikbaevalar shyǵaryp otyr. Taralymy 5 myń danany quraıtyn jýrnal qazaq, orys jáne aǵylshyn tilderinde jaryq kóredi. Alǵashqy nómirde Qazaqstannyń jas ǵalymy Damel Mektepbaeva, tanymal ánshi Dınara Sultanmen, Nazarbaev Ýnıversıtetiniń Prezıdenti Shıego Katsýmen suhbattar jarııalanǵan.

Sonymen qatar tanymal kásipqoı boksshy Gennadıı Golovkın de arnaıy hat joldap, jas tilshilerdiń bastamalaryna qoldaý bildirgen.

«Bizdiń jýrnalymyz  10-nan 19 jasqa deıin árbir qazaqstandyqtyń jýrnalıst bolyp qalyptasýyna, mańyzdy da qyzyqty ıdeıalarymen bólisýine, túrli kásip ıelerimen nemese qoǵamǵa paıdasy zor azamattarmen suhbattasýǵa múmkindik beredi», - deıdi jýrnaldyń bas redaktory Ásem Berik.