Mektep oqý baǵdarlamalary mindetti túrde táýelsiz saraptamadan ótkiziledi
«Jańartylǵan oqý baǵdarlamalary 2016 jyldan bastap bilim berý protsesine kezeń-kezeńimen engizilýde (2016 jyly – 1, 2017 jyly – 2, 5 jáne 7, 2018 jyly – 3, 6 jáne 8, 2019 jyly – 9 jáne 10, 2020 jyly – 11 synyptar). Úlgilik oqý baǵdarlamalary bekitilgenge deıin olardy tıisti bilim salalarynyń belgili ǵalymdary, pedagog-praktıkter birneshe ret talqylady, kópshiliktiń talqylaýy jáne jurtshylyqtyń qaraýy úshin ashyq portalǵa ornalastyryldy. Sondaı-aq bilim berýdiń jańartylǵan mazmunyna kóshýdiń baǵdarlamalary men kezeńderi 2016 jylǵy 31 mamyrda Parlament Májilisiniń Áleýmettik-mádenı damý komıtetiniń «12 jyldyq bilim berýdi engizý jáne mektepte oqytý standarttaryn jańartý jónindegi júıeli sharalar týraly» taqyrybyndaǵy otyrysynda qoldaý tapty. Budan basqa, 2017 jylǵy 22 qyrkúıekte ótken Parlament Senatyndaǵy parlamenttik tyńdaýdyń qorytyndysy boıynsha bilim berý mazmunyn jańartýǵa qatysty jumysty jalǵastyrý boıynsha usynymdar berildi«, - dep atap ótedi Úkimet basshysy.
Onyń aıtýynsha, bilim berýdiń jańartylǵan mazmuny engizilgenge deıin 2015 jyly 30 pılottyq mektepte oqý baǵdarlamalary, onyń ishinde Memlekettik jalpyǵa mindetti bilim berý standartynyń talaptaryn saqtaı otyryp ázirlengen jańa oqý pánderi boıynsha aprobatsııa júrgizildi. Barlyq testileýlerdiń nátıjeleri boıynsha pılottyq mektepter ortasha baldyń aıtarlyqtaı (+38,1 ball) progresine ıe. Bul baqylaý mektepteriniń kórsetkishterinen eki ese (+21,3 ball) artyq.
»Oqý baǵdarlamalaryn ázirleý kezinde pánaralyq, deńgeıaralyq baılanystar eskerildi. Olar barlyq oqý pánderiniń ıntegratsııasyna, oqýshylardyń tutas qabyldaýy men tárbıesine yqpal etetin ortaq taqyryptar arqyly iske asyrylady. Oqý baǵdarlamalarynyń sabaqtastyǵy oqýshylardyń jas erekshelikterin eskeredi, munda oqý baǵdarlamasynyń mazmuny spıral prıntsıpi boıynsha qarapaıymnan kúrdelige qaraı tiginen de, kóldeneńinen de kúrdelene túsedi«, - dedi Asqar Mamın.
Úkimet basshysy kelip túsken usynystar men usynymdardy eskere otyryp, oqý baǵdarlamalaryn jetildirý boıynsha jumys turaqty negizde júrgiziletindigin aıtady.
»Sondaı-aq, Parlament Májilisinde qaralyp jatqan bilim berý máseleleri jónindegi zań jobasy sheńberinde «Bilim týraly» Qazaqstan Respýblıkasy Zańynyń 5-babyna oqý baǵdarlamalarynyń mindetti túrde táýelsiz saraptamadan ótýi bóliginde ózgeris engiziledi. Saraptamadan ótken oqý baǵdarlamalary bilim berý uıymdarynda synaqtan ótkiziledi«, - dedi Premer-Mınıstr.