Mektep muǵalimderin UBT-dan bosatamyz - Erlan Saǵadıev
QR Bilim jáne ǵylym mınıstri Erlan Saǵadıevtiń aıtýynsha, mektep muǵalimderin artyq jumysqa salý tájirıbesi áli de bar. Ony tezdetip toqtatý qajet.
«Bizge muǵalimderden kóp saýaldar kelip túsedi. Sonyń basym kópshiligi - muǵalimderdi basqa jumystarǵa tartý. Ony sheshý úshin, birinshiden, esterińde bolsa, byltyrdan beri úı aralaýdy alyp tastadyq. Biraq osy ýaqytqa deıin muǵalimderdi qyzmetine qatysy joq jumysqa tartý oblystardyń praktıkasynda áli saqtalýda. Biz ony bilemiz. Sondyqtan búgin osy zalda otyrǵan oblys ákimderiniń orynbasarlary men bilim basqarmalarynyń basshylaryna aıtarym, bul tájirıbeni toqtatý qajet», - dedi E.Saǵadıev Tamyz konferentsııasynyń plenarlyq májilisinde.
Búginde mınıstrlik taǵy bir usynysty qoldap otyr. Ol - muǵalimderdi UBT-dan bosatý.
«Jańa oqý jylynan bastap mektep muǵalimderin UBT-ǵa qatysý mindetinen bosatý máselesi kóterildi. Mınıstrlik ony qoldaıdy. Muǵalim tek sapaly bilim berýmen aınalysýy kerek. Oǵan qosa, biz mektepterdiń UBT boıynsha reıtıngin alyp tastadyq. Sondyqtan muǵalim tek orta bilimge qatysty jumyspen ǵana aınalysady», - dep atap kórsetti E.Saǵadıev.
Aıta keteıik, bıyl mınıstrlik muǵalimderdiń júktemesine qatysty buıyryqty shyǵardy. Oǵan sáıkes, mektep muǵalimi tek 5 qujatty ǵana toltyrýǵa mindetti. Odan artyq salmaq salynsa, mektep basshylyǵynyń ústinen aryz túsirýge bolady. Budan bólek, mektep pen ata-analar arasynda kelisimsharttar rásimdeledi. Atalǵan bastama alǵash ret bıylǵy oqý jylynan bastap engizilip otyr.