Mektep medıtsınasynyń jańa standarty engiziledi

NUR-SULTAN. QazAqparat – QR Densaýlyq saqtaý mınıstrliginiń keńeıtilgen alqa otyrysynda vedomstvo basshysy Ajar Ǵınııat Qazaqstandaǵy eresekter men balalarǵa arnalǵan profılaktıkalyq tekserýlerdiń tizbesi keńeıtilgenin málim etti, dep habarlaıdy QazAqparat tilshisi.

«Qazirgi tańda úsh negizgi jas toby 18-29 jas, 30-44 jas, 45-65 jas boıynsha eresek halyqty profılaktıkalyq tekserý paketterin qalyptastyrý boıynsha jumys júrgizilýde», - dedi Ajar Ǵınııat.

Sondaı-aq, ol aýyldy eldi mekenderdegi halyqtyń denskýlyǵyn qadaǵalaý sharalaryna toqtaldy.

«Búginde qala men aýyl turǵyndary arasynda profılaktıkalyq tekserýlerdiń qol jetimdiliginde dısbalans oryn alǵany barshaǵa málim. Osyǵan baılanysty aǵymdaǵy jyly aýyl turǵyndary úshin profılaktıkalyq tekserý paketterin, onyń ishinde birinshi kezeńde aýyldyq medıtsınalyq pýnktter bazasynda engizý josparlanýda», - dedi mınıstr.

Vedomstvo basshysy balalar arasyndaǵy aýrýlardyń aldyn alýǵa baǵyttalǵan jumystar týraly málimet berdi.

«Mınıstrlik balalardyń densaýlyǵyn qorǵaý jónindegi is-sharalardy iske asyrý sheńberinde aldyn alýǵa erekshe nazar aýdaratyn bolady. Óıtkeni eresek halyqtyń densaýlyǵynyń negizderi men bolashaq aýrýlarynyń alǵysharttary dál balalyq shaqta qalanady. Osyǵan baılanysty júrgizilip jatqan zertteýlerdiń aǵymdaǵy kólemin eskere otyryp, balalardy profılaktıkalyq tekserý paketteri keńeıtiletin bolady», - dep habarlady Densaýlyq saqtaý mınıstri.

Atalǵan paketterdi túpkilikti qalyptastyrý úshin normatıvtik-quqyqtyq aktilerge ózgerister engizý jáne profılaktıkalyq tekserýlerdi qarjylandyrý boıynsha tıisti esepter júrgizilip jatqany aıtyldy.

«Budan basqa, mektep medıtsınasyn jetildirý sheńberinde jańa standart engiziletin bolady. Bul oqýshylardy kásiptik qaraý tásilderin júıeleýge jáne asqazan-ishek júıesi, tirek-qımyl apparaty, kórý qabiletimen baılanysty jáne t. b. aýrýlardy erte anyqtaýdy kúsheıtýge múmkindik beredi», -dedi Ajar Ǵınııat.