Mektep kitaphanalary 2,2 mln dana jańa ádebıetpen jańartyldy

NUR-SULTAN. QazAqparat – Mekteptegi psıhologııalyq qyzmetterdiń jumysyn jaqsartý úshin biryńǵaı erejeler engiziledi. Bul týraly búgin Úkimet otyrysynda QR Bilim jáne ǵylym vıtse-mınıstri Sholpan Karınova aıtty, dep habarlaıdy QazAqparat tilshisi.

«Búgingi tańda 6,5 myń mektep parlamentterinde oqýshylar ózin-ózi basqarýdy damytyp, mektepti basqarýǵa qatysýda. Kommýnıkatsııa jáne komandalyq jumys daǵdylaryn qalyptastyrý maqsatynda mektepterimizde 120 myńnan asa oqýshyny qamtıtyn 5 905 debat klýby ashyldy, sońǵy 5 aıda oǵan 16 myńnan asa bala qosyldy. «Oqýǵa qushtar mektep» respýblıkalyq jobasy aıasynda balalar arasynda oqyrmandar qozǵalysy jandandyryldy. Mektep kitaphanalarynyń kitap qory 2,2 mln dana jańa kórkem, balalar ádebıetimen jańartyldy», - dedi ol.

Onyń atap ótýinshe, balalardyń quqyqtaryn qorǵaý salasyndaǵy volonterlik qozǵalysqa serpin berildi. Úıde oqıtyn balalarǵa kómek kórsetýge 63 myńnan astam volonter qatysty. 5-11 synyptarǵa jańa oqý jylynan azamattyq, adaldyq, parasattylyq, etıka, medıasaýattylyq, qarjylyq saýattylyqty qamtıtyn «Patrıotızm jáne jahandyq quzyretter» kýrsy engiziledi.

«Mektep-ata-ana qarym-qatynasynyń formaty ózgertildi. Ádettegi ata-analar jınalystarynyń ornyna pedagogıkalyq-ata-ana konsılıýmdary balanyń oqý jetistikterin, tártibin, qyzyǵýshylyqtaryn jeke kezdesýlerde júıeli qaraıtyn boldy. Mekteptegi psıhologııalyq qyzmetterdiń jumysyn jaqsartý úshin bıyldan biryńǵaı erejeler engiziledi», - dedi Sholpan Karınova.