Mektep qazandyǵy jarylysynan qaza bolǵan jumysshynyń otbasyna kómek kórsetiledi

KÓKShETAÝ. QazAqparat – Arshaly aýdanynda mekteptiń jylý qazandyǵynyń jarylýynan qaza tapqan jumysshynyń otbasyna kómek kórsetiledi. Bul týraly Aqmola oblysy ákiminiń baspasóz qyzmetinen málim etti, dep habarlaıdy QazAqparat tilshisi.

«Jergilikti atqarýshy organdar Arshaly aýdany ákimdiginiń atynan qaza tapqan azamattyń otbasyna jerleý rásimderin uıymdastyrýǵa barlyq qajetti materıaldyq kómek kórsetedi», – dedi ákimdiktiń baspasóz qyzmetinen.

Sonymen birge vedomstvodan atap ótkendeı, zardap shekken ózge eki naýqastyń - 32 jáne 39 jastaǵy er adamdardyń jaǵdaıyn dárigerler turaqty dep baǵalap otyr.

«Olardy emdeý sharalary Arshaly aýdandyq aýrýhanasynyń hırýrgııalyq bólimshesi jaǵdaıynda júrgizilip jatyr», - delingen málimette.

Aıta ketsek, Aqmola oblysynyń Arshaly kentinde mekteptiń jylý qazandyǵy jarylyp, úsh adam zardap shekken edi. Olardyń biri - 55 jastaǵy er adam kóz jumǵany búgin habarlandy.

Qazirgi kezde apattyń saldaryn joıý jáne jylý berýdi qalpyna keltirý boıynsha shuǵyl jumystar atqarylyp jatyr.