Mektep formasy: Almaty bazarlaryndaǵy baǵa qandaı

ALMATY. QazAqparat – Jańa oqý jylyna on kún qaldy. Mektepte oqıtyn balasy bar ata-ananyń bári derlik dúken-bazar aralap, oqýshy kıimi men qalam-dápterin alyp jatyr. Oqý quraldary men kıim-keshek otbasy bıýdjetine qansha salmaq salady? QazAqparat tilshisi bazarlarǵa shyǵyp, baǵalardy óz kózimen kórip, ata-analarmen tildesip qaıtty.

Kóptegen qala turǵyndary men megapolıs qonaqtary saýda jasaý úshin baraholkaǵa barady. Olardyń pikirinshe, munda izdegenińdi arzan baǵaǵa tabýǵa bolady. Sonymen qatar, tańdaýǵa da múmkindik mol. Rasynda, bul jerden otandyq óndirýshilerdiń, Qytaıdan, Túrkııadan, Reseıden, Qyrǵyzstannan ákelingen zattardy kezdestirýge bolady.

Mektep formasyn satýshylardyń aıtýynsha, ata-analardyń basym bóligi otandyq brendterdi tańdaıdy. Olardyń baǵasy barlyq jerde birdeı.

Qyz balaǵa:

Aq jeıde – 6 000 teńgeden joǵary

Beldemshe – 7 000 teńge

Jaket – 12 000 teńge

Kókirekshe – 6 000 teńge

Shalbar – 6 000 teńge

Sarafan – 10 000 teńge

Barlyǵy: 47 000 teńge.

Ul balaǵa:

Pıdjak – 12 000 teńge

Kókirekshe – 6 000 teńge

Shalbar – 7 000 teńge

Jeıde – 5 000 teńge

Galstýk – 2 000 teńge

Barlyǵy: 32 000 teńge.

Bazarlarda, keńse taýarlaryn satatyn dúkenderde balalaryn jetektep, oqý quraly men mektep formasyn izdep júrgen ata-ana óte kóp. Solardyń biri – kópbalaly ana Móldir Muqanova. Balalarynyń úsheýi mektepte oqıdy. Aıtýynsha bári qymbattap ketken. Ol ár balasyna shamamen 90-100 myń teńge jumsapty.

«Kóbine otandyq óndirýshilerdiń kıimin alamyz. Qyzyma beldemshe qaradyq. Qara kók tústi beldemsheler 6-7 myń teńge shamasynda eken. Kostıými bólek satylady. Onyń baǵasy – 12 myń. Aq tústi jeıde 8 myń teńge boldy. Sómkeler 15 myń teńgeden bastalady. Aıaq kıimniń sapalysy 25 myń teńge dep tur. Jasóspirim qyzǵa keńse taýarlaryna 12-13 myń teńgedeı jumsalady. Buǵan dápter, qaryndash, qalamsap, pánge arnalǵan dápterler, syzǵysh, óshirgish, kúndelik, penal, qaptama kiredi», - deıdi ol.

Aıtýynsha, 2-synypqa baratyn ulyna 70 myń teńge jumsaǵan.

«Kostıým-shalbardy 23 myń teńgege satyp aldyq. Jeńi qysqa jáne uzyn aq jeıdege 11 myń teńge berdim. Galstýk – 3 myń. Klassıkalyq jáne sport aıaq kıiminiń árqaısysyn saýdalasyp júrip, 20 myń teńgege aldyq. Dene shynyqtyrýǵa kıetin formaǵa 8 myń teńge jumsadym. Endi osyǵan sómekesi men oqýǵa qajetti quraldaryn qosyńyz. Taǵy bir ulym 10-synypqa kóshti. Ol bizdiń alyp bergendi kımeıdi. Al, ózi tańdap alǵan kıimi men sómkesiniń baǵasy aıtpsaq ta túsinikti», - deıdi kópbalaly ana.

Rasynda, tipti jaı dápter bir jerde 35 teńgeden satylsa, bir jerde – 45 teńge. Al, 48 bettik qalyń dápterdiń eń arzany 250 teńgeden bastalady. Syzǵysh – 150, qalam – 35 teńgeden bastalyp, kóterile beredi.

Aıta ketsek, buǵan deıin Qazaqstanda keńse taýarlary 12 paıyzǵa qymbattaǵany týraly jazǵan bolatynbyz.