Mektep dırektorynyń jalaqysy muǵalimnen tómen bolǵany durys emes - Saparbaev

TÚRKІSTAN. QazAqparat – Búgin Úkimet múshelerinen quralǵan jumys toby Túrkistan oblysynyń ustazdarymen kezdesip, Prezıdenttiń halyqqa arnaǵan Joldaýyn túsindirdi. Premer-Mınıstrdiń orynbasary Berdibek Saparbaev pen Bilim jáne ǵylym vıtse-mınıstri Sholpan Karınova qujatta qamtylǵan ustazdardyń mártebesi men bilim salasynyń sapasyn sóz etti, dep habarlaıdy QazAqparat tilshisi.

Berdibek Saparbaev pedagogtarǵa Joldaýda mektepter men jalpy bilim salasyna kóp kóńil bólingenin, ustazdardyń jalaqysyn kóterý sııaqty máseleler qarastyrylǵanyn atap ótti. Sondaı-aq bul baǵyttar boıynsha Úkimet tarapynan da kóptegen júıeli jumystar atqarylyp jatqanyn jetkizdi.

«Mektep dırektorynyń jalaqysy muǵalimnen tómen bolǵany durys emes. Onyń kólemi «Muǵalimderdiń mártebesine» baılanysty zań qabyldanǵannan keıin kóteriledi. Dırektorlar men orynbasarlarynyń jalaqysy bilim sapasy men oqýshylardyń sanyna qaraı ósetin bolady. Eńbekaqysy kóteriletin mamandardyń qatarynda taǵy ádiskerler men logopedter bar. Balalarmen tikeleı jumys isteıtin synyp jetekshileriniń aılyq aqysyna da ústeme aqsha tólenedi», - dedi Berdibek Saparbaev.

Úkimet basshysynyń orynbasary sondaı-aq, balalardyń tárbıesine qatysty aıtyp, ustazdarǵa bul máselege kóbirek kóńil bólýdi eskertti.

«Synyp jetekshisi mektepke kelgen boıda balanyń qabaǵynan bárin bilip otyratyndaı deńgeıge jetý kerek. Balanyń áke-sheshesi týraly, otbasyndaǵy jaǵdaıy týraly habardar bolýy tıis. Bos ýaqyty bolmas úshin balaǵa paıdaly ispen aınalysýǵa jaǵdaı jasaý qajet. Jalpy, bul baǵytta ata-analardyń jaýapkershiligin arttyrý qajet. Olardy sabaqtarǵa qatystyryp, bárin kórsetken durys. Tárbıe sabaqtaryna zııaly qaýym ókilderin shaqyrǵan jón. Memleket, Úkimet metepterge barlyq jaǵdaıdy jasap jatyr, qalǵan aýyrtpalyqtar, ustazdar, sizderge baılanysty», - dedi vıtse-premer.

Ustazdarmen kezdesý barysynda jekemenshik balabaqshalar men mektepter salý barysynda jer ýchaskesine qol jetkizý, ondaǵy tekserý sharalarynyń kóptigi máseleleri sóz boldy. Sondaı-aq, kolledjderde qoǵamǵa qajeti az mamandyqtar daıarlaý, ondaǵy bilim sapasynyń tómendigi týraly aıtyldy.