Mektep dırektorlarynyń jalaqysyn da ósiremiz - Ǵanı Beısembaev

ASTANA. QazAqparat – Oqý-aǵartý mınıstri Ǵanı Beısembaev Senattyń jalpy otyrysynan keıin mekteptegi basshylyq laýazym ıeleriniń aılyǵy kóteriletinin málim etti, dep habarlaıdy QazAqparat tilshisi.

«Sizdiń aldyńyzdaǵy mınıstrdiń kezinde muǵalimderdiń ǵana emes, dırektorlar men orynbasarlarynyń, ózge de mektep qyzmetkerleriniń aılyǵy ósetini aıtylǵan edi. Sol ýáde oryndalmaǵany týraly shaǵymdar bar. Onyń sebebi nege baılanysty?» dep surady jýrnalıst.

Mınıstrdiń aıtýynsha, bıyl muǵalimderdiń aılyǵyn arttyrý sharasy tolyq aıaqtalǵan.

Endigi kezekte mektep basshylyǵyndaǵy laýazym ıeleriniń aılyǵy óspek.

«Memleket basshysynyń 2019 jyly bergen tapsyrmasy boıynsha, 2020 jyldan bastap muǵalimderdiń aılyǵy jyl saıyn 25 paıyz kóterilip otyrdy. Bıyl taǵy 25 paıyz artyp, eki ese kóterý tolyǵymen aıaqtaldy. Kelesi baǵytta mektep basshylarynyń aılyǵyn da kóterýge mán berýimiz kerek. Bul baǵytta da Oqý-aǵartý mınıstriligi birshama jumys atqaryp jatyr. Pysyqtap jatyrmyz, bul ońaı sharýa emes. Búkil oń-teris tustaryn esepteý kerek. Mindetti túrde mektep basshylarynyń aılyǵyn kóterý kerek. Biz ony qoldaımyz. Óıtkeni osy baǵytta jumys istep jatyrmyz», - dedi Ǵanı Beısembaev.