Mektep dırektorlary bos jumys oryndaryn jasyryp ustaıdy- Ashat Aımaǵambetov
«Bizde mektepte bar kóptegen bos oryndy dırektorlar kórsetpeıdi. Ony biz jaqsy bilemiz. Jasyryp ustaıdy. Tarıfıkatsııa jasaǵan kezde oryn bar dep kórsetip qoıady. Biraq zań bekitkendeı, tıisti organdarǵa, eńbekpen qamtý organdaryna kórsetpeıdi. Eshkimge ashyq aıtpaısyzdar. Qyrkúıek aıy ótkennen keıin, biraz ýaqyttan soń «adam kelmedi, muǵalim tappadyq» dep, sol bar saǵattardy ishtegi jumys istep júrgen muǵalimderge bólip beresizder. Bul - zańsyzdyq. Mundaıǵa zańmen kózdelgen jaýapkershilik, onyń ishinde ákimshilik te jaýapkershilik bar. Ol bos saǵatty bólgen kezde de táýekel kóp jáne obektıvti jumys júrmeıdi. Ony da bilemiz», - dep atap ótti Ashat Aımaǵambetov mınıstrliktiń apparat jınalysynda.
Onyń atap ótýinshe, bir stavkany 4-5 muǵalimge bólip berý jaǵdaılary da kezdesedi.
«Sonda qazaq tili bolsyn, matematıka bolsyn, 1 stavkany, 16 saǵatty bes adamǵa bólip berýge bolady. Bir synypta matematıkany ótkizgen kezde eki ne úsh muǵalim óte me? Mundaı zańsyzdyqqa qalaı barýǵa bolady? Birneshe oblysta 1,5-2 stavkamen jumys isteıtin adam kóp eken. Bir jaǵynan qarasaq, 40-50 paıyzy 1 stavkadan artyq júktememen otyr, onyń ishinde 10-20 paıyzynda tipti júkteme joq. Muny qalaı túsinýge bolady? Jumysqa adamdardy biz bekitken tártipti buzyp alatyndar bolsa, onda jaýapkershilikke tartamyz. Maqsat - mektepterdi bilimdi, bilikti pedagogtermen qamtamasyz etý. Muǵalimderdi ashyq ári ádil konkýrs arqyly jumys alýymyz kerek», - dedi mınıstr.