Mektep býhgalterleri aqshany kóbinde osy 5 ádis arqyly jymqyrady

<p>ASTANA. KAZINFORM - Antıkor mektep býhgalterleriniń qarjy jymqyrý shemalaryna sholý jasady.&nbsp;</p>

Sybaılas jemqorlyqqa qarsy qyzmet bilim salasyndaǵy jemqorlyq táýekelderine syrtqy taldaý júrgizgen.

Sol arqyly eńbekaqy tóleý qorynan qarajat jymqyrýdyń turaqty qylmystyq shemalaryn ashty:

• qyzmetkerlerge jalaqy onyń laýazymyna qaraǵanda áldeqaıda kóp aýdarylǵan;
• jalaqy bilim mekemelerinde resmı túrde tirkelmegen adamdarǵa berilgen;
• qyzmetkerdiń kart-shottaryna jalaqy eseptelip, al tólem qujatynda basqa tulǵanyń derekteri kórsetilgen;
• bir adamǵa aqsha aýdarymdaryn birneshe ret qaıtalaǵan;
• «óli jandarǵa» - týystary men jaqyndaryna aqsha aýdarǵan.

Býhgalterler mekteptiń býhgalterlik esep júıeleri, ulttyq bilim berý bazasy jáne «Qazynashylyq-klıent» júıesi arasynda ıntegratsııa joqtyǵyn paıdalanǵan.

Olar tólem qujattaryna qolmen túzetý engizip, bıýdjet aqshasyn jymqyrǵan.

Jyl saıynǵy bıýdjettik ótinimderdi qalyptastyrý kezinde jymqyrylatyn qarajat belgilengen.

Aıta ketý kerek, jymqyrý boıynsha buryn ashylǵan shemalar sheńberinde sotqa deıingi tergeýdi búginde basqa quqyq qorǵaý organdary júrgizip jatyr. 

Eske sala keteıik, búgin Antıkor Túrkistan oblysynyń eki aýdanynda bilim salasynda bir jylda 3,7 mlrd teńge jymqyrylǵanyn habarlaǵan edi. 

Sondaı-aq, Qyzylorda oblysynyń Jańaqorǵan aýdanynda bilim bóliminiń bastyǵy sybaılastarymen birge sottaldy.