Mektep avtobýsy: Almatyda pılottyq joba iske qosylady
Almaty qalalyq bilim basqarmasynyń málimetinshe, mektep avtobýstary, eń aldymen asa qajet aýdandarǵa engiziledi. Pılottyq jobaǵa tórt aýdan tańdap alyndy. Atap aıtar bolsaq, Bostandyq, Naýryzbaı, Alataý jáne Medeý aýdandary. Oqýshy sanyna qaraı ár mektepke arnaıy marshrýttar jasalady. 20, 30, 50 oryndyq avtobýstar bar. Joba kezeń-kezeńimen júzege asyrylady.
Ata-analar arasynda júrgizilgen saýalnama qortyndysy boıynsha, qazir 38 myńǵa jýyq bala mektep avtobýstaryna muqtaj.
Buǵan deıin megapolıs basshysy Erbolat Dosaev 2023 jyldyń I toqsanynda 100 jańa mektep avtobýsy jetkizilip, zamanaýı qaýipsizdik júıesimen jabdyqtalatyny týraly aıtqan bolatyn. Tasymaldaý qyzmetterine 1,4 mlrd teńge bólindi.
Sondaı-aq, qala mektepterinde keshendi qaýipsizdik júıesi engizildi. Dabyl túımeleri, týrnıketter, órt qaýipsizdigi júıesi, polıtsııanyń jedel basqarý ortalyqtarymen biriktirilgen beınebaqylaý kameralary ornatyldy. Ákimdik bul jobany úsh jyldyq servıstik úlgi boıynsha qarjylandyrýdy josparlap otyr. Jalpy qarjylandyrý kólemi - 4,9 mlrd teńge. 2023 jylǵa arnalǵan bıýdjet jobasynda osy maqsattarǵa 1,6 mlrd tenge bólindi.
«Qaýipsizdikke keletin bolsaq, barlyq qalalyq bilim berý uıymdary beınebaqylaý kameralarymen jabdyqtalǵan, kameralar men dabyl túımeleri jergilikti polıtsııa bólimderine qosylǵan. Sonymen qatar, 120 bilim berý uıymdarynda týrnıketter ornatyldy, 94 bilim berý uıymdarynda konkýrstyq rásimder ótkizilýde, sondaı-aq keıbir uıymdarda sport ınventarlaryn jańartý jáne tolyqtyrý qajet ekeni anyqtaldy», - dedi óńirlik kommýnıkatsııalar qyzmetiniń alańynda Almaty qalasynyń bilim sapasyn qamtamasyz etý departamentiniń basshysy Gúlnar Ermekbaeva.
Budan bólek, zamanaýı ınfraqurylymdy jaqsartý arqyly 2025 jylǵa deıin barlyq memlekettik mektepter fızıka, hımııa, bıologııa, ınformatıka jáne robototehnıkanyń jańa býynynyń pándik kabınetterimen qamtamasyz etiledi. Tek 2023 jyldyń ózinde jańa modıfıkatsııadaǵy 168 shkaf satyp alynady, bul maqsatqa jergilikti qordan 2,1 mlrd teńge bólindi.
«Monıtorıng barysynda anyqtalǵandaı, 164 bilim berý uıymy jańa modıfıkatsııalanǵan fızıka kabınetimen, 158 mektep hımııa kabınetimen, 159 bilim berý uıymy jańa modıfıkatsııalanǵan bıologııa kabınettermen jáne 79 bilim berý uıymy zamanaýı robototehnıka kabınetterimen jabdyqtalǵan. Sonymen birge, 56 bilim berý uıymynda jańa modıfıkatsııalanǵan kabınet alýǵa konkýrstyq rásimder júrip jatyr», - dedi Gúlnar Ermekbaeva.
Eske salaıyq, byltyr Almatydaǵy memlekettik mektepte oqıtyn barlyq bastaýysh synyp oqýshylary (1-4 synyptar) áleýmettik mártebesine qaramastan tegin ystyq tamaqpen qamtylǵan bolatyn. Ózge óńirlerge úlgi bolǵan joba bıyl da jalǵasyn tappaq.