Oqýshylardyń jappaı ýlanýy: ashana ydys jýýshysy dızenterııa tasymaldaýshy bolyp shyqty
Eske salaıyq, 07-13 qyrkúıek aralyǵynda Munaıly aýdany Besshoqy turǵyn massıvinde ornalasqan №8 jalpy bilim berý mektebinde oqýshylardyń jappaı astan ýlaný deregi tirkeldi.
Osy oqıǵaǵa oraı, Mańǵystaý oblysy Ulttyq saraptaý ortalyǵynyń zerthana mamandary epıdemıologııalyq jospardan tys tekserý júrgizip, daıyn tamaq ónimderi, sý jáne ashana qyzmetkerlerinen bakterıologııalyq tekserýge synamalar alǵan bolatyn.
Qorytyndyǵa sáıkes, mektep ashanasyn sanıtarııalyq – epıdemıologııalyq tekserý barysynda óreskel sanıtarlyq buzylýshylyqtar anyqtalǵan. Pisken tamaq ónimderi kartop ezbesinen, qus etinen ázirlengen kotletten, soýstan jáne kompottan patogendi bakterııalar zerthanalyq túrde dáleldengen. Sondaı-aq ydystardan ishek bakterııalary tabyldy.
– Mektep ashanasynda jumys isteıtin 10 qyzmetkerden, 1 medıtsınalyq qyzmetkerden jáne 1 jeke kásipkerden alynǵan bakterıologııalyq tekserýdiń nátıjesinde 6 adamnan stafılakok taıaqshalary anyqtaldy. Al, ydys jýýshynyń dızenterııa bakterııasyn tasymaldaýshy ekeni zerthanalyq túrde dáleldendi. Ol sonymen qatar balalarǵa as taratýshy da bolyp jumys istep, tamaqty lastaǵan, - deıdi oblystyq sanıtarııalyq-epıdemıologııalyq baqylaý departamenti basshysynyń orynbasary Asylbek Sharov.
Ashana jumysshylarynyń jeke medıtsınalyq kitapshalaryn tekserý barysynda 4 adamnyń jalǵan medıtsınalyq tekseristen ótkeni anyqtalǵan. Bul jóninde oblystyq prokýratýraǵa jáne oblystyq ishki ister departamentine hat joldanǵan. Qazirgi tańda osy jaǵdaı boıynsha Munaıly aýdandyq Polıtsııa basqarmasymen qylmystyq kodekstiń 1 bólimi, 304 baby boıynsha qylmystyq is qozǵalyp, sotqa deıingi tergeý bastaldy.