Mektep ashanalaryn tekserý nátıjesi jarııalanady

<p>Bastaýysh synyp oqýshylaryna beriletin tegin ystyq tamaqtyń sapasyna jóndi qaramaı júrgen mektepter máselesi mınıstrlik deńgeıinde qaralady. Bul týraly Qazaqstannyń ornyqty damý salasyndaǵy ulttyq maqsattar men mindetterdi iske asyrý monıtorıngi jónindegi Parlamenttik komıssııa otyrysynan keıin Oqý-aǵartý mınıstri Ǵanı Beısembaev aıtty, dep habarlaıdy QazAqparat tilshisi.&nbsp;</p>

Aıta keteıik, 2023-2024 jylǵy oqý jyldarynda elimizde bastaýysh synypta oqıtyn 1,4 mln bala tegin tamaqtanady. Alaıda oqý jylynyń basynda mektep ashanalarynda balalarǵa arnalǵan tamaqtyń sapasyna qatysty ata-analar shaǵym aıta bastady.

«Elimiz aýmaǵynda ystyq tamaqpen qamtamasyz etý máselesin qadaǵalaý boıynsha tıisti top tekserip jatyr. Barlyq óńirde 1-4 synyp oqýshylaryna tegin ystyq tamaqpen berýge qarajat tolyq bólingen. Biraq qoǵamda onyń sapasyna jáne tolyqtaı qamtýǵa qatysty suraqtar qoıyla bastady. Sondyqtan monıtorıng toby osy kemshilikterdi anyqtap, bul saladaǵy máseleni mınıstrliktiń apparattyq keńesinde qarastyramyz», - dedi Ǵ. Beısembaev «QazAqparat» tilshisiniń suraǵyna jaýap bere otyryp.

Onyń aıtýynsha, monıtorıng tobynyń qadaǵalaý jumystary 10 qazanda aıaqtalady.

«Keıbir aımaqtarda talaptardy oryndamaǵan jekelegen mektepter anyqtalyp jatyr. Bul turǵyda olarǵa naqty sharalar qoldanylady. Jergilikti ákimdikterge mektep ashanalarynyń jumysyn tıisti deńgeıde uıymdastyrý máselesine qatysty hat joldaımyz», - dedi mınıstr.