Mektep ashanalaryn azyq-túlikpen qamtamasyz etý erejesin jetildirý kerek — depýtat
«Premer-mınıstr Mańǵystaý oblysynda oqýshylardyń ýlanýy oqıǵasyna baılanysty máseleni óziniń baqylaýyna alyp, mektep ashanalarynda sanıtarlyq-epıdemıologııalyq qyzmettiń tekserý jumystaryn júrgizýdi mindettedi. „AMANAT“ partııasynyń fraktsııa músheleri tarapynan atalǵan másele únemi kóterilip keledi. Biraq, jaýapty vedomstva ókilderi de, jergilikti atqarýshy organdar da salǵyrttyq tanytyp jatyr. Qazirgi kezde sanıtarlyq-epıdemıologııalyq qyzmet mektep ashanalaryn júıeli túrde teksere almaı otyr. Sebebi, shaǵyn jáne orta bıznesti tekserýge moratorıı jarııalanǵan kezeńde, ashanalar uzaq ýaqyt boıy tekserýden ótpegen. Qazir maratorıı alynyp tastaldy. Osyǵan baılanysty sanıtarlyq-epıdemıologııalyq qyzmettiń mektep ashanalaryn turaqty túrde tekserýin qamtamasyz etý qajet. Ýlaný jaǵdaılary oryn alǵan kezde, sanıtarlyq-epıdemıologııalyq qyzmet jaýapkershiligi de qarastyrylsyn», — dedi N. Dementeva Úkimet basshysynyń orynbasary Tamara Dúısenovanyń atyna joldaǵan saýalynda.
Onyń aıtýynsha, mektep ashanalaryna jetkiziletin taǵam ónimderiniń sapasy men olardyń jaramdylyq merzimin baqylaýdy kúsheıtý qajet.
Veterınarlyq jáne sanıtarlyq baqylaý júıeleriniń tıimdiligin arttyrý maqsatynda mektep ashanalaryna jetkiziletin ónimderdiń qaıdan alynǵany, onyń ishinde et pen sút ónimderiniń naqty qaı sharýashylyqtan nemese bazardan jetkizilgeni týraly aqparattyń ashyqtyǵyn qamtamasyz etý kerek.
Bul rette, azyq-túlik ónimderiniń sapasy, qaýipsizdigi jáne saqtaý merzimine baılanysty talaptar qatań saqtalýy tıis. Jaýapty organdar mektepterge jetkiziletin barlyq taǵam ónimderiniń sertıfıkattalýyn jáne olardyń sapasyn júıeli túrde tekserýdi qamtamasyz etýi tıis.
Osy is-sharalar Úkimet deńgeıinde rettelip, veterınarlyq baqylaý júıesine qosymsha talaptar engizilýi qajet.
«Mektep ashanalaryn tamaqpen qamtamasyz etýge arnalǵan memlekettik satyp alý erejelerin jetildirý ózekti. Qazirgi kezde bul salada monopolııaǵa jol bermes úshin mektepterge arnalǵan tenderlerde ashyqtyq pen básekelestikti qamtamasyz etetin talaptardy kúsheıtý kerek. Atap aıtqanda, memlekettik satyp alýlar týraly erejege mektep ashanalary úshin tamaq ónimderin jetkizý boıynsha tenderge qatysatyndarǵa qoıylatyn talaptardy naqtylap, 1 kompanııanyń neshe mektepte tender utyp alý múmkindigin shekteýge baılanysty ózgerister engizý qajet. Satyp alý protsesiniń tıimdiligi men ashyqtyǵyn qamtamasyz etý úshin qarjylyq baqylaýdy kúsheıtip, merdigerlerdiń jaýapkershiligin arttyrý jóninde sharalar qabyldaý kerek», — dedi depýtat.
Eske salaıyq, 6 qyrkúıek kúni Munaıly aýdany Besshoqy aýylynda № 8 mekteptiń bastaýysh synyptarynda oqıtyn oqýshylar astan ýlanyp qaldy.
Osy oqıǵaǵa qatysty qylmystyq isti birlesken jumys toby tergep jatyr. Onyń quramynda polıtsııa, ekonomıkalyq tergeý departamenti men prokýratýra qyzmetkerleri bar.