«Mektebimiz apattyq jaǵdaıda tur»: Rıdderlik ata-analardyń talaby eskerildi
ShQO Aqparat ortalyǵynyń málimetine súıensek, oblys ákiminiń orynbasary Darhan Sapanov Rıdder qalasynda dóńgelek ústel ótkizip, ata-analardyń talap-tilekterin tyńdady.
«Rıdderdegi qazaq tildi «Shańyraq» gımnazııasynyń ata-analary mekteptiń apatty jaǵdaıda turǵanyn aıtyp, jańa bilim ordasyn suraǵan. Al áleýmettik jelilerde taraǵan aqparattarǵa sengen №11 mekteptiń ata-analary óz balalaryn jańa ǵımarattan shyǵaryp jiberedi dep qaýiptengen. Osylaısha eki taraptyń arasynda túsinispeýshilik týyndap, daýǵa ulasqan», - delingen habarlamada.
Rıdderdegi №11 mektep pen «Shańyraq» gımnazııasynyń ana-analary arasynda uıymdastyrylǵan dóńgelek ústel beıbit kelisimmen aıaqtaldy.
«Máseleni sheshý úshin eki tarapty da tolyq tyńdadyq. Sosyn eki jaqpen birlese otyryp, ortaq jınalys ótkizdik. Bul óte durys sheshim boldy. Ata-analar túsinispeýshilikti birlese otyryp sheshýge kómektesti. Nátıjesinde, «Shańyraq» gımnazııasy apattyq jaǵdaıǵa baılanysty tekseristen ótedi. Eger tekseris nátıjesi mektepti apatty jaǵdaıda dep tanysa «Shańyraqtyń» oqýshylary №11 mekteptiń ǵımaratyna ustazdarymen birge aýystyrylatyn bolady. Eki mekteptiń de barlyq quqyqtary saqtalady. Mańdaıshaǵa №11 mekteptiń de, «Shańyraq» gımnazııasynyń da ataýlary ilinedi. Atalmysh bilim ordasy bir aýysymda 600 oqýshyny qabyldaýǵa qaýqarly. Bul degen qos mekteptiń oqýshylary eki aýysymda esh kedergisiz bilim alady degen sóz», - deıdi Darhan Sapanov.