Meksıkada maımyldar aptap ystyqtan qyrylyp jatyr

<p>ASTANA. KAZINFORM &ndash; Meksıkanyń ońtústik-shyǵysyndaǵy tropıkalyq ormandardaǵy quryp ketý qaýpi tóngen baqyraýyq maımyldar sońǵy aptalarda qurǵaqshylyq pen qatty aptap ystyqtan qyrylyp jatyr, dep habarlaıdy <a href="https://www.reuters.com/world/americas/mexicos-howler-monkeys-dropping-dead-heat-toll-mounts-2024-05-20/" target="_blank" rel="noopener">Reuters aqparat agenttigi</a>.</p>

Osy aptada aýanyń temperatýrasy 45 gradýstan joǵary kóteriledi dep boljanǵan Tabasko shtatynda jergilikti BAQ 85 maımyldyń qyrylǵany týraly habarlady. Bılik buny rastady, biraq qyrylǵan janýarlardyń naqty sanyn usynǵan joq.

Kamalkalko qalasynyń mańyndaǵy ormanda, Tabaskoda eriktiler ystyqtan ólgen kolýmbııalyq ókiretin maımyldardyń (alouatta palliata) ólekselerin jınap, janýarlar óliminiń aldyn alý úshin sý men jemis-jıdek quıylǵan shelekterdi qoıdy.

Kolýmbııalyq baqyraýyq maımyl Halyqaralyq tabıǵatty qorǵaý odaǵynyń Qyzyl tiziminde «osal» sanatqa engizilgen.

«Bul sondaı qatty ystyqtyń kesirinen bolyp jatqan jaǵdaı. Men bul shtattarda uzaq ýaqyt boldym, biraq buǵan deıin osynshama aptap ystyqty sezinbegen edim. Sondyqtan biz janýarlarǵa qamqorlyq tanytýymyz kerek jáne biz sony isteımiz», - dedi Tabaskodan kelgen Meksıka prezıdenti Andres Manýel Lopes Obrador.

Meksıkanyń qorshaǵan ortany qorǵaý mınıstrligi keıinirek maımyldar ólimin joıý boıynsha kúsh-jigerdi úılestiretinin málimdep, olardyń qyrylýyn birneshe yqtımal sebeptermen, sonyń ishinde ystyq soǵý, sýsyzdaný, durys tamaqtanbaý nemese aýylsharýashylyq daqyldaryn ýly agrohımıkattarmen búrkýmen baılanystyrady.

Meksıkada, sonymen qatar, ormandardyń kesilýine baılanysty Qyzyl kitapta «joıylyp ketý qaýpi tónip turǵandar» tizimine engen ortalyqamerıkalyq baqyraýyq maımyl mekendeıdi.

Meksıkanyń Densaýlyq saqtaý mınıstrligi 17 naýryz ben 11 mamyr aralyǵynda aptap ystyqtan elde shamamen 26 adam qaıtys bolǵanyn habarlady.