Meksıkada Golovkınniń jankúıerleri az emes

ASTANA. QazAqparat - WBA, WBC pen IBF tujyrymdary boıynsha álem chempıony Gennadıı Golovkınniń kelesi qarsylasy - meksıkalyq Saýl Alvares ekendigi belgili. Soǵan qaramastan, Meksıkanyń ózinde GGG-diń jankúıerleri az emes. Oǵan boksshynyń áleýmettik paraqshasynda jarııalanǵan vıdeo dálel bola alady, dep xabarlaıdy QazAqparat tilshisi.

Aıta ketken jón, buǵan deıin Gennadıı Golovkın meksıkalyq stılmen bokstasatyny jaıynda aıtyp keldi. Qazirgi kezde onyń qarsylasy Saýl "Kanelo" Alvarestiń komandasy ony sol sózi úshin keketip, aldaǵy jekpe-jekte naǵyz "meksıkalyq stıldi" kórsetemiz dese de, meksıkalyq jankúıerlerdiń óz ishinde GGG-di qoldaıtyndar barshylyq. Oǵan Golovkınniń "meksıkalyq stıli" ǵana emes, Alvarestiń WBC tıtýlynan bas tartqany da áser etti. Byltyr osy tıtýldyń basshylyǵy ony GGG-men bokstasýǵa mindettegende "Kanelo" sot protsesin jeleý etip, jekpe-jekten de, belbeýden de bas tartqan edi. Sodan bastap meksıkalyq fanattardyń narazylyǵy kúsheıe tústi. Golovkın jaǵyna aýysyp ketkender de kóp boldy.

Al GGG toby jarııalaǵan vıdeoda Gennadıı Golovkınniń aty jazylǵan jeıdeler men beısbolkalardy ǵana emes, Meksıka týlaryn da kórýge bolady.

Golovkın - Alvares jekpe-jegi 16 qyrkúıekte Las-Vegastyń "T-Mobile Arena" sport kesheninde ótedi. Ýaqyt aıyrmashylyǵyna baılanysty atalǵan jekpe-jek Qazaqstanda 17 qyrkúıek kúni tańǵy saǵat 9:00-de tikeleı efırden kórsetiledi.