Meksıka prezıdenti koronavırýs juqtyrdy

MEHIKO. QazAqparat – Meksıka prezıdenti Andres Manýel Lopes Obrador jeksenbi kúni óziniń COVID-19-ǵa tapsyrǵan testi oń nátıje kórsetkenin málimdedi. Aýrý jeńil ótýde. Meksıka prezıdenti óziniń resmı Twitter paraqshasynda emdelip jatqanyn aıtty, dep habarlaıdy QazAqparat AR agenttigine silteme jasap.

«Ókinishke qaraı, sizderge COVID-19 juqtyrǵanymdy habarlaımyn. Sımptomdary jeńil, qazir emdelip jatyrmyn. Ádettegideı, men optımıstik kóńil-kúıdemin», - dep jazdy prezıdent Twitter paraqshasynda.

Eldiń densaýlyq saqtaý mınıstrliginiń epıdemıologııalyq jaǵdaı jónindegi bas dırektory Hose Lýıs Alomııa Zegarra onyń «úıde oqshaýlanǵanyn» jáne prezıdentte aýrýdyń jeńil belgileri bar ekenin aıtty.

Іshki ister mınıstri Olga Sanches Kordero prezıdenttiń atynan ádette eki saǵat boıy úzilissiz sóıleıtin kúndelikti baspasóz konferentsııasyna qatysady.

Elde COVID-19-dan 150 myńǵa jýyq ólim jáne 1,7 mıllıonnan astam aýrý juqtyrý jaǵdaıy tirkelgen.

Ótken aptada elde koronavırýsqa shaldyǵý men ólim jaǵdaılarynyń eń joǵary deńgeıi tirkeldi.