Mekemtas Myrzahmetov: Abaıdy mánine jetip ulyqtaýymyz kerek

NUR-SULTAN. QazAqparat – Shákárim men Abaıdyń fılosofııalyq lırıkasy qaıtadan ashylýy kerek. Abaı Qunanbaıulynyń 174 jyldyǵyna oraı elordada ótken rýhanı-taǵylymdyq is-sharada belgili abaıtanýshy, professor Mekemtas Myrzahmetov osylaı dedi, dep habarlaıdy QazAqparat tilshisi.

«Abaıdy ár kezde ulyqtap jatamyz. Ulyqtaý – durys. Biraq, mánine jetip ulyqtaýymyz kerek. Abaıdyń rýhanı álemi men pálsapalyq lırıkasyna Eýropa da, Shyǵys ta jete almaǵan. Shákárim men Abaıdyń fılosofııalyq lırıkasy qaıtadan ashylýy kerek. Bul – bir. Zaman ózgerdi. Dúnıetanym ózgerdi. Biz endi uly sanaǵa qaraı jol tarttyq. Endigi tanym uly sanaǵa qaraı ketedi. Ony burynǵy babalarymyz áldeqashan bilgen, keıingi ómir opan-topan bolǵan kezde olardy shaıyp ketti de, qaıtadan osy jolǵa oralýǵa májbúr bolyp otyrmyz. Abaıdan qalǵan bir mura bar: Abaıda «Tolyq adam» ilimi degen bar. «Tolyq adam» ilimin meńgergen adam ózin-ózi rýhanı tazalaıdy. Qazir osy ilim Qazaqstandaǵy 8 ýnıversıtette oqytylyp jatyr. Sonyń monografııasyn jazyp bitirdim. Ol tolyq jarııalandy. Endi búkil qazaq jastaryn Abaıdyń álemimen tazartý máselesi aldymyzǵa qoıylyp otyr. Onyń oqýlyǵy daıar boldy», - dedi ol.

Eske sala ketsek, búgin Abaı Qunanbaıulynyń dúnıege kelgenine 174 jyl tolýyna oraı elordada «Abaı álemi» atty rýhanı-taǵylymdyq is-shara ótken bolatyn. Onda elimizge belgili zııaly qaýym ókilderi, abaıtanýshylar men qala ákimdiginiń ókilderi bas qosty.

Aıta ketsek, QR Prezıdenti mamyr aıynda Abaıdyń 175 jyldyq mereıtoıy týraly Jarlyqqa qol qoıǵan edi.