«Mefedron» jasyrǵan — SQO-da kolledjdiń eki stýdenti ustaldy

<p>Soltústik Qazaqstan oblysynda 18 jáne 21 jastaǵy eki jigit ońaı oljaǵa kenelemin dep esirtkini arnaıy jerge jasyrýmen aınalysqan. Kúdiktiler ınternet dúkende bir aı ister-istemesten ustaldy, endi 15 jylǵa deıin sottalýy múmkin, dep habarlaıdy Kazinform.</p>

SQO Polıtsııa departamenti baspasóz qyzmetiniń málimetinshe, kúdiktiler - oblys aýdandarynyń turǵyndary. Jigitterdiń ekeýi de jaqsy otbasynda ósken, sportpen shuǵyldanyp, kolledjde bilim alǵan. Jasy kishisiniń sporttyq jetistikteri de bar.

Shilde aıynda jigitterdi SQO PD esirtki qylmysyna qarsy is-qımyl basqarmasynyń qyzmetkerleri esirtki jasyryp júrgen jerinde ustady. Olardyń bireýinen belgisiz zaty bar 21 túıinshek tárkilendi. Ekinshi jigit kórsetken jerden taǵy 2 túıinshek tabyldy. Saraptama onyń jalpy salmaǵy 19,81 gramm bolatyn «mefedron» ekenin kórsetti. Bul eń qaýipti sıntetıkalyq esirtkilerdiń biri. Ustalǵandardyń aıtýlarynsha, olar osyndaı jolmen mol aqsha tappaq bolǵan.

"Kúdiktilerdiń biri esirtki satatyn ınternet-dúkende bir aıǵa jeter-jetpes ýaqyt qana jumys istep úlgergen. Atalǵan fakti QR Qylmystyq kodeksiniń 297-babynyń 3-bóligi boıynsha Sotqa deıingi tergep-tekserýlerdiń biryńǵaı tizilimine engizildi. Baptyń sanktsııasy 10 jyldan 15 jylǵa deıingi merzimge bas bostandyǵynan aıyrý jazasyn kózdeıdi", - deıdi SQO PD esirtki qylmysyna qarsy is-qımyl basqarmasynyń bastyǵy Rýslan Saparov.

Foto: SQO PD baspasóz qyzmeti

Jastardyń osyndaı qylmystyq «bızneske» túsip qalýynyń aldyn alý maqsatynda qazir polıtseıler profılaktıkalyq jumystardy arttyrdy. Petropavldaǵy mektepterdiń birinde jýyrda ótken kezdesýde SQO PD bastyǵy Aıdyn Qabduldınov jeńil aqsha tappaq bolǵan jastardyń ınternet-dúkenderde tek 2-3 aı ǵana istep úlgeretinin aıtty. Óıtkeni olardy polıtsııa qyzmetkerleri qolǵa túsiredi. Dese de esirtki satýshylar ońaı jolmen aqsha tabýǵa daıyn adamdardy áleýmettik jeliler arqyly izdep, tabady eken.

SQO polıtseıleri 9 aıdyń ishinde esirtki zattaryn jasyrýdyń 84 faktisin tirkedi.