Medsaqtandyrý qoryna eń kóp jarna memleket esebinen tústi - Aıbatyr Jumaǵulov

NUR-SULTAN. QazAqparat - Qazirgi ýaqytta Qazaqstan halqynyń 90%-nan astamy - MÁMS qatysýshylary. Ortalyq kommýnıkatsııalar qyzmetinde «Áleýmettik medıtsınalyq saqtandyrý qory» KEAQ Basqarma tóraǵasy Aıbatyr Jumaǵulov mindetti áleýmettik medıtsınalyq saqtandyrý júıesi jumysynyń birinshi aıynyń qorytyndysy týraly aıtty, dep habarlaıdy QazAqparat tilshisi.

«2019 jyldyń qyrkúıeginen bastap 1406 nómiri boıynsha Biryńǵaı baılanys ortalyǵy jumys isteı bastady. Búgingi tańda baılanys ortalyǵyna azamattardan 37 myńnan astam joldanymdar kelip tústi, olardyń 97%-y keńes alý, 3%-y - shaǵymdar sıpatynda boldy», - deıdi Aıbatyr Jumaǵulov.

Ol qazirgi ýaqytta Qazaqstan halqynyń 90%-nan astamy, ıaǵnı 17 mln adam MÁMS qatysýshylary ekenin aıtty.

«Onyń ishinde 11 mln-ǵa jýyq azamat jeńildik berilgen 15 sanatqa kiredi. Olar úshin jarnalardy memleket júzege asyrady. 2020 jyldyń qańtar aıynda MÁMS úshin jarna jáne aýdarymdar retinde 34,2 mlrd teńge aýdaryldy. Eń kóp jarna - 24 mlrd teńgeden astam qarjy memleket esebinen tústi»,- deıdi ol.