Medıtsınalyq uıymdardyń kredıtorlyq bereshegi 100 mlrd teńgeden asty - depýtat

<p>Elimizdegi kóptegen medıtsınalyq uıym keıingi úsh jylda qarjy jaǵdaıy boıynsha qıyndyqqa tap boldy. Bul rette senator Aqmaral Álnazarova óziniń depýtattyq saýalynda medıtsınalyq uıymdardyń nesıe bereshegine qatysty máselelerdi atady, dep habarlaıdy <a href="Kazinform" target="_blank" rel="noopener">Kazinform</a>.</p>

«Bıylǵy 11 jeltoqsanda Parlament Senatynyń tóraǵasy jáne Senattyń birqatar depýtaty Óskemende oblys basshylyǵymen jáne oblystyq máslıhat depýtattarymen kezdesý ótkizgen bolatyn. Onda Shyǵys Qazaqstan oblysynyń densaýlyq saqtaý uıymdaryndaǵy kúrdeli qarjy ahýalyna qatysty máseleler aıtyldy. Máselen, oblystaǵy 13 uıymda 6 mlrd teńgeden astam, onyń ishinde eńbekaqy tóleý qory boıynsha 1,3 mlrd teńgeden astam somasynda nesıe bereshegi qalyptasqan», - dedi A. Álnazarova

Depýtattyń aıtýynsha, 2023 jylǵy 20 qarashadaǵy jaǵdaı boıynsha 619 medıtsınalyq uıymda jalpy somasy 109,6 mlrd teńge bolatyn kredıtorlyq bereshegi bar. Medıtsınalyq uıymdar tıimsiz shyǵyndardy ǵana emes, halyqqa kórsetiletin qyzmetterdiń kólemin de qysqartýǵa májbúr. Medıtsınalyq qyzmetterdiń tarıfi naqty shyǵyndy jaba almaıdy.

«Tek eseptelgen kredıtorlyq bereshektiń kólemi 2021 jyldan bastap 2 ese kóbeıip, 2022 jyldyń qorytyndysy boıynsha 100 mlrd teńgeni qurady. Al qazir onyń somasy 109 mlrd teńgege jetti. Bul salany qarjylandyrý kóleminiń 2,5 ese ósýine qaramastan bolǵan jaǵdaı. Sondaı-aq keıingi 3 jylda halyqtyń qalta shyǵyny da kútkendegideı azaıa qoımady»,- dedi senator.

Senator medıtsınalyq uıymdardaǵy bul qarjy problemalary densaýlyq saqtaýdy strategııalyq josparlaýdaǵy kemshilikterge, medıtsınalyq qyzmetter nomenklatýrasynyń bolmaýyna, sondaı-aq shyǵystardy baqylaý tetiginiń azdyǵyna baılanysty ekenin atap ótti. Aqmaral Álnazarova osyǵan baılanysty jaǵdaıdyń sebebin taldap, medıtsınalyq uıymdardyń bereshegin tómendetý jáne qarjyny paıdalaný tıimdiligin arttyrý úshin shuǵyl ári júıeli sharalar qabyldaýdy surady.