Medıtsınalyq uıymdar qurylysyna otandyq ónimderdi qoldaný kerek – Oljas Bektenov
«Medıtsınalyq uıymdardy jıhazben jáne qurylys materıaldarymen qamtýda óz óndirýshilerimizdi qoldap, otandyq ónimdi qoldaný qajet. «Samuryq-Qazyna» qory men onyń enshiles uıymdary otandyq taýarlar men qyzmetterdi keńinen satyp alyp, ózimizdiń qazaqstandyq taýar óndirýshilerge, onyń ishinde shaǵyn jáne orta bızneske qoldaý kórsetýi tıis. Qor basshylyǵynyń nazaryn, birinshi kezekte osyǵan aýdarǵym keledi. Ótken aptada jeńil ónerkásip qaýymdastyǵynyń basshysy Saltanat Ábdikárimova «Samuryq-Qazyna» qorynyń taýar satyp alý saıasatyn synǵa alyp, konkýrs ótkizýde shıkiliktiń baryn aıtyp, shaǵymdandy. Osy oraıda men kásipkerlerdiń jaǵyndamyn», - dedi Oljas Bektenov Úkimet otyrysynda.
Úkimet basshysynyń aıtýynsha, densaýlyq saqtaý uıymdaryn salý men jabdyqtaýda jaǵdaıdy túbegeıli ózgertip, otandyq óndirýshilerdi qoldaý júıesin jetildirý kerek.
«Bul máseleniń aýyldyq jerlerdegi medıtsına obektilerin salý men qamtamasyz etýge de qatysy bar. Ulttyq jobany júzege asyrý sapasyn jaqsartý úshin jumys qarqynyn barynsha kúsheıtý qajet. Jobany úılestirý jáne monıtorıngteý mindeti «Turar Healthcare» ulttyq operatoryna júktelgen. Alaıda, kórip otyrǵanymyzdaı, onyń oryndalý sapasy nashar», - deıdi ol.
Odan bólek, Premer-Mınıstr obektilerdi salýda qurylys jumystaryn barysyna baqylaýdyń joqtyǵyn aıtty.
«Árbir obektiniń qurylysyn qujattardy daıyndaý, qarjylandyrý kezeńinen bastap, ýaqtyly tapsyrǵanǵa deıin kúndelikti baqylaýǵa alý qajet. Sondaı-aq, jańa aıtyp ótkenimdeı, medıtsınalyq jabdyqtarmen jáne kadrmen qamtamasyz etý máselesi de nazardan tys qalmaýǵa tıis», - deıdi ol.