Medıtsınalyq saqtandyrylmaǵandar júrgizýshi kýáligin almaıdy: Mınıstr talapty túsindirdi
«Densaýlyq saqtaý mınıstrliginiń keıbir memlekettik qyzmetterdi shekteý týraly usynystaryna qatysty toqtalsam, bul baǵytta álemdik tájirıbe zerdelendi. Kóptegen elde, ıaǵnı Germanııa, Norvegııa, Ulybrıtanııa jáne basqa da damyǵan elderde tıisti talaptar bar. Eger júrgizýshi kýáligin alǵyńyz kelse, medıtsınalyq saqtandyrý suralady. Atap aıtqanda, basqa memleketke saparlap barǵan kezde de medıtsınalyq saqtandyrýsyz eshkimdi qabyldamaıtynyn bilesizder», –dedi A. Ǵınııat Parlament Májilisinde tilshiler suraǵyna jaýap bere otyryp.
Aıtýynsha, jyl saıyn Qazaqstanda shamamen 3 myń adam jol-kólik apatynan kóz jumady.
«Jol apattary kóp tirkelip jatyr. Men kúnine 10 nemese odan da kóp jazataıym oqıǵa týraly aqparat alamyn. Zardap shekkenderdiń jartysy qaıtys bolady, negizinen eńbekke qabiletti jastaǵy jastar, balalar. Olardyń teń jartysy aýyr halde medıtsınalyq uıymdarǵa jatqyzylady. Adamdar mundaı jaǵdaıǵa tap bolǵanda, «Siz saqtandyrylǵansyz ba?» dep suraǵan medıtsınalyq qyzmetkerge qalaı qaraıdy dep oılaısyz? Al biz bul jerde shuǵyl kómek týraly aıtyp otyrǵan joqpyz, sebebi jedel kómek onsyz da birinshi kezekte iske asyrylady. Biraq keıbir travmatologııalyq, ortopedııalyq, kúrdeli operatsııalar olar Mindetti áleýmettik medıtsınalyq saqtandyrý júıesine engizilgen. Sondyqtan medıtsına qyzmetkerlerine naýqastan «Erteń ota jasaý kerek, siz saqtandyrý júıesinde barsyz ba?» dep surap turý yńǵaısyz. Munyń bári adam densaýlyǵyna qatysty», – dedi mınıstr.
Bul turǵyda A. Ǵınııat ár adam medıtsınalyq saqtandyrý júıesine qosylýy kerek ekenin aıtty.
Aıta keteıik, buǵan deıin saqtandyrylmaǵan adamdarǵa densaýlyq jáne osy salaǵa qatysty memlekettik qyzmetterdi alý kezinde tıisti shekteý engizý usynyldy. Máselen, kólik júrgizý, qarý-jaraq saqtaý jáne basqa da baǵyttarda osyndaı shekteýler qarastyrylmaq.