Medıtsınalyq kómekke júginse, Saltanattyń aman qalýy múmkin edi — advokat Orazbaqova

<p>ASTANA. KAZINFORM &mdash; Sot otyrysynda memlekettik aıyptaýshy Aıjan Aımaǵanova marqum Saltanat Núkenovanyń máıitine jasalǵan sot-medıtsınalyq saraptamanyń mátinin jarııalaýdy ótindi. Buǵan Bıshimbaevtyń advokattary qarsylyq tanytqanymen, sýdıa Aıjan Kúlbaeva saraptamanyń oqylýyna sheshim qabyldady.</p>

«Sot-medıtsınalyq saraptama kezinde Saltanat Núkenovanyń denesinen bas súıek-mı jaraqaty, betinde kóptegen jara men qan anyqtaldy. Murny synǵan, murnynyń aınalasyndaǵy terisine qan quıylǵan, bas terisine qan quıylyp, sýbdýraldy gematoma (mıdyń uzaq materııalyq qabatynyń astynan qan ketý) tirkeldi», — dedi saraptamany oqyǵan jábirlenýshi taraptyń advokaty Janna Orazbaqova.

Onyń aıtýynsha, der kezinde medıtsınalyq kómekke júgingende S. Núkenovanyń tiri qalý múmkindigi joǵary bolatyn edi. Oǵan negiz joq emes. Meıramhanadaǵy beınejazbalardan Bıshimbaevtyń inisi Baqytjan Baıjanovtyń dárige tapsyrys bergenin ańǵarýǵa bolady.

«Osy sátterde jedel járdem qyzmetin shaqyrsa, jaǵdaı basqasha órbıtin edi», — degen oı kópshilikti mazalaıdy.

Dese de, sarapshylar kómek kórsetilgen jaǵdaıda Núkenovanyń aman qalý múmkindigine naqty jaýap bere almady.

«Alynǵan jaraqattar ortalyq júıke júıesiniń jumysynyń buzylýyna, keıin toqtaýyna, júrek qyzmeti men tynys alýdyń toqtaýyna ákeldi. Bul — ólimge tikeleı sebep boldy», — dedi J. Orazbaqova.

Saraptama qorytyndysyna sáıkes, S. Núkenovanyń qanynan esirtki, dárilik jáne psıhotroptyq zattar tabylmaǵan. Alkogol az mólsherde tirkelgen.

Eske salsaq, 2023 jyly 9 qarashada Astanadaǵy «Bau» meıramhanasynda burynǵy Ulttyq ekonomıka mınıstri Qýandyq Bıshimbaev óziniń jubaıyn soqqyǵa jyqty. Áıel jedel járdem jetkenshe kóz jumdy. Munan soń Іshki ister mınıstrligi Qýandyq Bıshimbaevtyń ustalǵanyn rastady.

Ótken jyly 15 qarashada ótken keńeste Memleket basshysy Qasym-Jomart Toqaev Іshki ister mınıstrine Q. Bıshimbaevtiń isin erekshe baqylaýǵa alýdy tapsyrdy. Bıyl 11 qańtarda elorda soty Qýandyq Bıshimbaevty kúzetpen ustaý merzimin 2 aıǵa uzartqan edi, 26 aqpanda Qýandyq Bıshimbaevtyń isi sotqa tústi.

1 naýryzda Qýandyq Bıshimbaevtyń isi boıynsha aldyn ala tyńdaý kúni belgilendi. 11 naýryz kúni Astananyń Qylmystyq ister jónindegi mamandandyrylǵan aýdanaralyq sotynda is boıynsha aldyn ala tyńdaý ótti. Aldyn ala tyńdaý 12 naýryzda jalǵasty.

27 naýryzda elordanyń qylmystyq ister jónindegi mamandandyrylǵan aýdanaralyq sotynda Q.Bıshimbaevtyń isi boıynsha alqabılerdi irikteý ótti. 29 naýryzdaǵy sot otyrysynda marqum Saltanat Núkenovanyń aǵasy Aıtbek Amangeldi kýáger retinde jaýap berip, Qýandyq Bıshimbaev pen Saltanat Núkenovanyń arasyndaǵy alǵashqy urys-kerister qalaı bastalǵany týraly málimetter aıtty jáne marqumnyń bet-álpeti kógergen sýret kórsetti.

1 sáýirdegi sot otyrysynda aıyptalýshy Qýandyq Bıshimbaev marqum S. Núkenovanyń týystarynan keshirim surady.

Sondaı-aq sot eks-mınıstr Qýandyq Bıshimbaevtyń isindegi taraptarǵa áleýmettik jelide pikir bildirýge tyıym saldy.