Medıtsınalyq qyzmetterdi táýelsiz baǵalaý júıesin qurýdyń mańyzy zor — Máýlen Áshimbaev

<p>ASTANA. KAZINFORM &mdash; Jyl saıyn elimizde ulttyq densaýlyq saqtaý salasyna qomaqty qarjy bólinedi. Byltyr bul kórsetkish 2,6 trıllıon teńgeni quraǵan. Alaıda, odan medıtsınalyq qyzmettiń sapasy jaqsara qoıǵan joq. Bul salada mindetti medıtsınalyq saqtandyrý júıesi sııaqty áli de bolsa sheshilmegen túıtkilder bar. Búgin Senat otyrysynda densaýlyq saqtaý máseleleri jónindegi zańdy qaraý barysynda Palata tóraǵasy Máýlen Áshimbaev osyndaı pikir bildirdi.</p>

«Jalpy, densaýlyq saqtaý júıesi boıynsha mańyzdy máseleler bar. Byltyr barlyǵyn eseptegende osy salaǵa 2,6 trıllıon teńge bólindi. Bul — aýqymdy qarajat. Soǵan qaramastan, qyzmetterdiń sapasy árdaıym joǵary deńgeıde bola bermeıdi. Ótken jyly Ulttyq statıstıka bıýrosy áleýmettik saýalnama júrgizdi. Olardyń zertteýine sáıkes, saýalnamaǵa qatysqan azamattardyń 56 paıyzy jedel medıtsınalyq kómek ortalyqtarynyń qyzmetine narazylyqtaryn bildirgen. Jalpy, medıtsınalyq qyzmet boıynsha da nátıje osyǵan uqsas. Sondaı-aq azamattar bilikti mamandardyń bolmaýy, uzyn-sonar kezek, dári-dármektiń jáne kórsetiletin qyzmetterdiń tym qymbat bolýy sııaqty máselelerge nazar aýdarǵan», — dedi M. Áshimbaev. 

Azamattar mindetti medıtsınalyq saqtandyrý júıesi boıynsha kórsetiletin qyzmetterdiń sapasyna qatysty da osyndaı olqylyqtardyń bar ekenin aıtyp júr. Sondyqtan Senat tóraǵasy medıtsına qyzmetkerleriniń kásibı qyzmetin saqtandyrýdyń jańa júıesine kóshý kezinde olardyń qyzmetin táýelsiz baǵalaý júıesin qurý asa mańyzdy ekenin atap ótti.

Sondaı-aq ol bul rette normanyń tıimdiligine monıtorıng júrgizý depýtattar men memlekettik organdardyń mindeti ekenin de aıtty. Osy iste senatorlar qajet bolsa jańa qadamdar jasaýǵa da daıyn.

«Biz medıtsına qyzmetkerleri men patsıentterdiń múddeleri arasyndaǵy teńgerimdi saqtaýymyz kerek. Bul normanyń odan ári oryndalýyn, qalaı jumys isteıtinin qaraý qajet. Múmkin komıssııalardy medıtsınalyq mekemelerden bólý kerek shyǵar. Olar densaýlyq saqtaý departamentteriniń nemese basqa qurylymdardyń janynda jumys istegeni durys bolar. Eger patsıentterdiń sapasyz qyzmetterdi alýǵa qatysty shaǵymdaryn táýelsiz baǵalaý jolǵa qoıylsa, saqtandyrýdyń búkil júıesi iske qosylady. Bizdiń tıisti Komıtet osy máselemen aınalysady. Bárin zerdelep, biraz ýaqyttan keıin atalǵan normaǵa qaıta oralýymyz da múmkin», — dedi Máýlen Áshimbaev.

Aıta keteıik, búgin Senat otyrysynda «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zań eki oqylymda qaraldy. Azamattardy sapaly jáne keńinen medıtsınalyq kómekpen qamtamasyz etý, patsıentterdiń memleket kepildik bergen quqyqtaryn iske asyrý, medıtsınalyq mamandyqtyń mártebesi men bedelin arttyrý zańnyń negizgi mindetteri ekenin atap ótken jón.

Talqylaý nátıjesinde senatorlar zańdy kontseptýaldy túrde qoldady. Sondaı-aq oǵan birqatar ózgerister engizip, qujatty jańa redaktsııamen Májiliske qaıtardy.