Medıtsına bizdiń otbasylyq kásibimizge aınaldy – atyraýlyq dáriger
Óziniń aıtýynsha, Atyraý qalasyna 2014 jyly Ózbekstan Respýblıkasynan kóship kelgen. Qazir munaıly shahardaǵy №7 emhanada jumys istep júr.
«Bala kezimnen dáriger bolýdy oılap júrdim. Buǵan áke-sheshem men aǵa-ápkelerimniń, jeńgem men jezdemniń medıtsına salasynda jumys istegeni áser etti. Bizdiń úlken áýlettiń ókilderi jınala qalǵanda, áńgime baǵyty medıtsınaǵa, adamnyń densaýlyǵyna, dıagnostıka men emdeý tásilderine burylady. Osyndaı ortada óskendikten bolar, men de dáriger mamandyǵyn meńgerýdi qaladym. Sóıtip, 2002 jyly Tashkent pedıatrııa ınstıtýtynyń Nókistegi fılıalyn bitirdim», -deıdi Gúlbahar Mámbetkárimova.
Keıin ata-enesi atajurtqa oralýdy kózdepti. Ata-enesinen qalmaı, kúıeýimen birge kindik qany tamǵan óńirden jyraqtaǵy Atyraýǵa qonys aýdarǵan.
«Atyraý buryn kórmegen qala bolǵanymen, maǵan unady. Mamandyǵyma baılanysty jumysqa ornalasý úshin osy emhananyń basshysyna jolyqqan edim. Sol kezdegi dırektor Ǵazız Esqalı aǵamyz bastaǵan ujym meni týysqanyndaı baýyrǵa tartty. Qazir dáriger bolǵanyma ókinbeımin. Óıtkeni, bala kezden áke-sheshemizdiń turǵyndardyń densaýlyǵyn jaqsartý úshin aıanbaı eńbek etkenin kórip óstim. Dárigerlik bizdiń otbasylyq kásibimizge aınaldy», -deıdi Gúlbahar Mámbetkárimova.
Bıyl onyń atalǵan emhanada jumys istegenine 10 jyl tolǵan. Ol emhanadan bólingen eki ýchaske turǵyndarynyń densaýlyǵyn tekseredi. Onyń biri mekenjaı boıynsha aýmaqtyq bolsa, ekinshisi qosymsha retinde berilipti. Buǵan qosa S.Ótebaev atyndaǵy Atyraý munaı jáne gaz ýnıversıteti stýdentteriniń densaýlyǵyn qadalaǵaý da júktelipti.
Ózimen birge jumys isteıtin medbıkeler Gúlnur Ǵalymova, Ásııa Qabdolova jáne Sálıma Nyǵmetpen birge bárine úlgeredi. Bir-birin jaqsy túsinetine olar turǵyndardyń telefon qońyraýyna kezekpen jaýap beredi. Aq halattylardyń qyzmetine turǵyndar udaıy rızashylyǵyn bildirip otyrady.
«Biraz jyldan beri Atyraý qalasynyń «Aqdepo» dep atalatyn bóliginde turamyn. Jas ulǵaıǵan soń dárigerge jıi qaralamyn. Dáriger men medbıkeler jylyshyraımen qabyldaıdy. Sypaıy sóılesedi. Daýys kóterip, qabaq shytqanyn kórmedik. Dıagnozdy dál qoıyp, tez emdeýge tyrysady. Úsh jyl buryn koronavırýs ınfektsııasymen aýyrdym. Aýrýhanalarda oryn bolmady, sondyqtan, úıde emdelýime týra keldi. Sol kezde Gúlbahar Mámbetkárimova kún saıyn úıge kelip, aýrýdyń dınamıkasyn baqylap otyrdy. Onyń emdeýimen syrqatymnan tez aıyqtym. Qazir otbasymyzben osy dárigerge qaralamyz», -deıdi 65 jastaǵy patsıent Juldyz apaı.
Jaqynda Gúlbahar Mámbetkárimova jalpy tájirıbelik dárigerlerdiń respýblıkalyq baıqaýynda baq synady. Onyń osy saladaǵy tájirıbesi, emdeý tásili zerdelenip, «Úzdik otbasylyq dáriger» atandy.
«Dáriger retinde syrqatyna shıpa izdep kelgen patsıentterge tıimdi emdeý tásilin qoldaný qaǵıdatyn ustanamyn. Óıtkeni, basty mindetim – syrqat jandardy emdep, densaýlyǵyn tezirek túzeýine úles qosý. Al jetistikke jetýime emhana men sala basshylary, barsha áriptesime, ózimniń senimdi serigime aınalǵan medbıkeler qoldaý kórsetti. Bul – ujymdyq eńbektiń jemisi», -deıdi Gúlbahar Mámbetkárimova.
Eske sala ketelik, budan buryn Atyraýlyq dárigerler kólikte jalǵyz bolǵan 1 jasar balany ólimnen aman alyp qalǵanyn jazǵan edik.