Medıtsına aýrýdyń aldyn alý úshin jumys isteýi kerek - Tamara Dúısenova
Tamara Dúısenova dárilik zattardy tańbalaý jáne qadaǵalaý júıesimen tanysty. Dári-dármekter qozǵalysy elge ákelingen jáne óndirilgen sátten bastap patsıent nemese satyp alýshy dárihanalar arqyly alǵanǵa deıin naqty ýaqyt rejıminde baqylanady. Atalǵan tizbektegi qoımalardyń biri Túrkistan qalasynda ornalasqan.Aıta keteıik, júıe engizilgeli beri munda 13 túrli otandyq dári-dármektiń 1,5 myńnan astam qaptamasy qabyldanǵan. Osy jerden olar oblystyń emdeý mekemelerine jiberiledi. Qazyǵurt aýdandyq ortalyq aýrýhanasynda preparattardy statsıonarda qabyldaý jáne paıdalaný protsesi kórsetildi.
Vıtse-premer emdeý mekemesiniń jumysymen tanysyp, emdelýshilermen áńgimelesti.
Aýrýhana bazasynda ótken jyldan bastap ońaltý ortalyǵy jumys isteıdi. Bul ortalyqtyń qyzmetterin operatsııadan shyqqan, ınsýlt alǵan jáne basqa da naýqastar paıdalanady. Munda 400-den astam adam tegin kýrstarmen qamtylǵan.
Memleket basshysynyń tapsyrmasy boıynsha «Aýylda densaýlyq saqtaýdy jańǵyrtý» ulttyq jobasy iske asyrylyp keledi. Baǵdarlama aıasynda Túrkistan oblysynda 49 MSAK nysanynyń qurylysy qarastyrylǵan. Olardyń biri Mahambet Ótemisov aýylynda turǵyzyldy.
Jumys sapary aıasynda vıtse-premerdiń tóraǵalyǵymen óńirde densaýlyq saqtaý júıesin damytý jóninde keńes ótti. Oǵan jaýapty Mınıstrliktiń, Mindetti medıtsınalyq saqtandyrý qorynyń ókilderi, oblystyń medıtsınalyq uıymdarynyń basshylary qatysty. Memleket basshysy alǵa qoıǵan mindetterdi oryndaý aıasynda medıtsınalyq kómektiń biryńǵaı paketin qalyptastyrý máseleleri de sóz boldy.
«Medıtsına aýrýdyń aldyn alý úshin jumys isteýi kerek. ıAǵnı, bizge sapaly jáne ýaqtyly dıagnostıka qajet. Emhana dárigerleri atqarar jumys kóp. Emdeý mekemesine bekitilgen azamattardy ózektendirý qajet. Sonymen qatar júıege saqtandyrylmaǵan adamdardy tartý mańyzdy. Bul sharalar Memleket basshysy qoıǵan mindetterdi sapaly oryndaýǵa múmkindik beredi», — dedi Tamara Dúısenova.
Jýyrda Prezıdent halyqqa Joldaýynda aýyl turǵyndarynyń tabysyn arttyrýǵa baǵyttalǵan «Aýyl amanaty» baǵdarlamasyna oń baǵa berdi. Jeńildetilgen nesıeniń artyqshylyǵyn Túrkistan oblysynyń aýyl turǵyndary da kórdi. Solardyń biri, Saýran aýdany Oranǵaı aýylynan Babyr Nasyrov dánekerleý jáne jıhaz tsehyn ashqan. Osy maqsatta 5 mln teńge kóleminde nesıe aldy. Satyp alynǵan jabdyqtyń kómegimen ol qurylys úshin metall konstrýktsııalar, jıhaz jasaıdy.
«Qazir mende turaqty negizde 12 adam jumys isteıdi. Tapsyrystar kóp bolǵan kezde qosymsha adamdardy tartamyn. Ónimge degen suranys óte úlken. Sondyqtan jaqyn arada óz isimdi keńeıtýdi josparlap otyrmyn», — deıdi kásipker.
Aýyldyń taǵy bir turǵyny Bahadır Izraılov joba arqyly aýlasynda mal bordaqylaý alańyn uıymdastyrdy. Jergilikti kooperatıv múshelerine mal azyǵy tómendetilgen baǵamen beriledi. Jalpy aýdanda aýyl sharýashylyǵy kooperatıvteriniń jumysy jolǵa qoıylǵan. Berilgen egis alqaptarynda bıdaı, jońyshqa, júgeri ósiriledi. Qazyǵurt aýdany Aınatas aýylynda aýyl turǵyndarynyń ónim kórmesi uıymdastyryldy. Negizgi nazar ónimdi qaıta óńdeýge aýdaryldy. «Aýyl amanaty» aýyl turǵyndaryna óz isin túrli baǵytta ashýǵa múmkindik berdi. Bireýi jartylaı fabrıkattar, ekinshisi ulttyq kıimder men at ábzelderin shyǵarady. Túıequs jumyrtqalaryn satýmen aınalysqandar da bar.
Qaldyqtardy qaıta óńdeýshiler erekshe nazar aýdartty. Mysaly, Amantaı Ańdasov plastıkalyq qaldyqtardan túrli turmystyq kerek-jaraqtar jasaıdy. Taǵy bir turǵyn qaǵaz qoqystan lotoktar óndirýdi jolǵa qoısa, taǵy bir qatysýshy aǵash qaldyqtarynan kómir óndirip júr. Vıtse-premer jobalarǵa joǵary baǵa berip, bul «Taza Qazaqstan» baǵdarlamasynyń jaqsy jalǵasy bolýy múmkin ekenin atap ótti.
Bıznes bastaýǵa berilgen óteýsiz granttar da oń nátıjege jeteleıdi. Mysaly, Esbol Erden bıyl stanokqa qol jetkizip, ol úshin shamamen 1,5 mln teńge alǵan. Metaldan túrli zattar jasap, oıý-órnegi bar qaqpalar daıyndaıdy. Ol óndiriste ulttyq stıldi qoldanǵandy jón kóredi.
Óńirge sapar aıasynda Tamara Dúısenova aýyldyq okrýg ákimderimen keńes ótkizdi. Onda aýyl turǵyndarynyń ál-aýqatyn arttyrý sharalary talqylandy. Prezıdent Qazaqstan halqyna Joldaýynda ataýly qoldaý kórsetýge nazar aýdardy. Otbasynyń tsıfrlyq kartasy derekteri negizinde otbasylardyń ál-aýqaty deńgeıine baılanysty 5 sanaty anyqtaldy.
Daǵdarystyq jáne shuǵyl sanattaǵy otbasylarmen jumys isteý úshin memlekettik qoldaýdyń neǵurlym ońtaıly sharalary paıdalanylýy tıis. Oblys ákimi Darhan Satybaldy «Bir aýyl – bir ónim» tásilin engizý jospary týraly baıandady. Onyń máni – jergilikti shıkizattan joǵary qundy ónim óndirý. Vıtse-premer bul bastamaǵa oń baǵa berdi. Sondaı-aq, Memleket basshysy Qazaqstan halqyna Joldaýynda taýarlyq nesıeni paıdalanýǵa nazar aýdarǵanyn jetkizgendigin aıtqan Tamara Dúısenova ákimderdi osy quraldardy belsendi paıdalanýǵa shaqyrdy.