Medıtsınalyq jyljymaly keshender 1,8 mln adamdy vaktsınatsııalady

NUR-SULTAN. QazAqparat – Medıtsınalyq jyljymaly keshender elimizdiń 1,8 mln turǵynyn vaktsınatsııalady. Bul týraly Densaýlyq saqtaý mınıstrliginiń Medıtsınalyq kómekti uıymdastyrý departamenti dırektorynyń orynbasary Gúlnar Sársenbaeva aıtty, dep habarlaıdy QazAqparat tilshisi.

«Elimizdiń densaýlyq saqtaý júıesi koronavırýs ınfektsııasymen baılanysty jahandyq ózgerister aıasynda kúrdeli aýyrtpalyqqa shydas berip, birshama sapaly ózgeristerdi bastan keshirdi. Máselen, medıtsınalyq-sanıtarlyq alǵashqy kómek uıymdary janynan shamamen 3 myń mobıldi brıgada quryldy. Olar koronavırýs ınfektsııasyn juqtyrǵan patsentterge kómek kórsetýde tıimdiligin kórsetti. Osy tájirıbe jetildirip, damytylyp jatyr. Búginde kóliktegi medıtsına shalǵaıdaǵy aýyldardyń turǵyndaryna medıtsınalyq kómekti qamtamasyz etip otyr. Atap aıtqanda, 149 jyljymaly medıtsınalyq keshen aýyldarǵa shyǵyp, halyqtyń maqsatty toptaryna skrınıngtik zertteýler júrgizedi. Beıindi mamandar keńes berý úshin qabyldaıdy», - dedi ol Ortalyq kommýnıkatsııalar qyzmetinde ótken dóńgelek ústel barysynda.

Onyń dereginshe, ótken jyly jyljymaly medıtsınalyq keshender halyqty vaktsınatsııalaý jumysyn júrgizdi. Shalǵaıdaǵy eldimekenderdiń shamamen 1,8 mln turǵynyna koronavırýs ınfektsııasyna qarsy ekpe jasady.

«Jyljymaly medıtsınalyq keshenderdiń jumys qorytyndysynda sozylmaly aýrýlary bar tulǵalar anyqtalyp, baqylaýǵa alyndy. Bıyl da keshender bekitilgen kestege saı jumys istep jatyr. Osy jylydń 1-toqsanynda 300 myńnan astam turǵyny bar 550 eldi mekenge qyzmet kórsetildi. 118 myń dıagnostıkalyq, 57 myńnan astam zerthanalyq zertteý jasaldy. Shamamen 16 myń naýqas anyqtalyp, onyń 3 myńǵa jýyǵy baqylaýǵa alyndy», - dedi Gúlnar Sársenbaeva.