Medıtsınalyq uıymdarda keıbir dári-dármek bolmaı qalýy múmkin

NUR-SULTAN. QazAqparat – Medıtsınalyq uıymdar halyqqa tegin qyzmet kórsetý úshin qajetti dári-dármekti satyp ala almaı jatyr. Oǵan satyp alýdy júzege asyrýy tıis veb-portaldyń jumys istemeýi sebep bolyp otyr, dep habarlaıdy QazAqparat «Atameken» UKP-ge silteme jasap.

Mamyr aıynda Úkimet tegin medıtsınalyq kómektiń kepildik berilgen kólemi jáne MÁMS júıesi sheńberinde dári-dármekter men medıtsınalyq buıymdardy satyp alýdy retteıtin qaǵıdalarǵa engiziletin ózgeristerdi qabyldady. Qujattyń jańa redaktsııasynda dástúrli tásilmen satyp alý protsedýralaryn ótkizý múmkindigi tolyǵymen alynyp tastaldy. Endi aýrýhanalar belgili bir dári-dármek «SK-Farmatsııa» biryńǵaı dıstrıbýtsııa júıesi arqyly satyp alynatyn preparattar tizimine enbese de, olardy elektrondy tásilmen ǵana satyp alýy tıis.

«Atameken» UKP atqarýshy hatshysy, basqarma múshesi Nurlan Saqýovtyń aıtýynsha, satyp alýdy elektrondy formatqa aýystyrý – qısyndy ári boljamdy protsess. Alaıda, satyp alýdyń elektrondy platformasyn tolyǵymen jolǵa qoımaı jatyp, dástúrli satyp alýdy alyp tastaý arqyly Densaýlyq saqtaý mınıstrligi medıtsınalyq uıymdardy da, medıtsınalyq zattar men tehnıkany jetkizýshilerdi de tyǵyryqqa tiredi.

«Medıtsınalyq qyzmetterdi kórsetýge qajetti barlyq preparat pen medıtsınalyq buıymdardyń barlyǵy «SK-Farmatsııa» arqyly satyla bermeıdi. Aýrýhanalar dári-dármektiń kóptegen atalymyn izdep, satyp alady. Qazirgi kezde portaldyń daıyn bolmaýy saldarynan ónimniń osy túrlerin satyp alý tolyǵymen toqtap tur. Farmatsevtıkalyq ónimderdiń óndirýshileri men jetkizýshileri portalǵa kire almaı otyr. Osydan patsıentter – qatardaǵy qazaqstandyqtar zardap shegip jatyr. Densaýlyq saqtaý mınıstrligi azamattardyń múddesin oılaýy tıis», - dedi Nurlan Saqýov.

«Atameken» UKP mamandary osy másele boıynsha bıznes ókilderimmen birqatar kezdesý ótkizgen. Densaýlyq saqtaý mınıstri atyna portal jumysy jolǵa qoıylǵanǵa deıin burynǵy normalardy qaıtarý qajettigine qatysty hat joldanǵan.

Foto: pixabay.com