Medıtsınalyq saqtandyrý: Jarty jylda 630 myńnan astam adam statsıonarlarda emdeldi

NUR-SULTAN. QazAqparat - Jarty jyldyń qorytyndysy boıynsha Áleýmettik medıtsınalyq saqtandyrý qory MÁMS paketindegi medıtsınalyq kómekti tóleýge 156,7 mlrd teńgeden astam qarjy jiberdi, dep habarlady QazAqparat ÁMSQ baspasóz qyzmetine silteme jasap.

Osylaısha, 6 aı ishinde MÁMS-ke 260 mlrd teńgeden astam somada jarnalar men aýdarymdar tústi. Sonymen qatar, olardyń basym bóligi - 146,6 mlrd teńge - bul halyqtyń 15 jeńildikti sanatyna jatatyn 11 mln-ǵa jýyq azamattar úshin jarnany memleket tóledi.

«Qor 2020 jyldyń 6 aıynyń qorytyndysy boıynsha MÁMS paketi sheńberinde kórsetilgen medıtsınalyq qyzmetter úshin 156,7 mlrd teńgeden astam qarajat tólendi. Tólem halyqqa kórsetilgen medıtsınalyq qyzmetterdiń sapasy men kólemine monıtorıng júrgizilgennen keıin ǵana júzege asyrylady. Klınıkalyq hattamalardy jáne emdeýge qajetti talaptardy saqtaı otyryp, fakti boıynsha kórsetilgen jáne qujatpen rastalǵan qyzmetter ǵana tólenedi» - delingen habarlamada.

Qordyń baspasóz qyzmetinde túsindirgendeı, MÁMS úshin jarnalar men aýdarymdar Áleýmettik medıtsınalyq saqtandyrý qorynyń ózine emes, Ulttyq banktegi arnaıy shotqa túsedi. Ol jerden qarajat MÁMS paketi boıynsha kórsetilgen medıtsınalyq qyzmetterge aqy tóleýge medıtsınalyq uıymdar – Qordyń jetkizýshilerine jiberiledi.

Qorda naqtylaǵandaı, jarty jyldyqtaǵy shyǵyndardyń basym bóligi statsıonarlyq medıtsınalyq kómek tólemi - 50 mlrd teńgeden astam. 6 aı ishinde josparly túrde elimizdiń statsıonarlarynda 630 myńnan astam adam emdeldi.

Kórsetilgen konsýltatsııalyq-dıagnostıkalyq kómek úshin shamamen 42 mlrd teńge tólendi. Atap aıtqanda, dıagnostıkalyq qyzmetter arasynda KT jáne MRT qyzmetteri azamattar úshin ózekti. Jarty jyl ishinde patsıentterge 1,1 mlrd teńgeden astam somaǵa 96 myńnan astam KT qyzmeti jáne 1,6 mlrd teńgeden astam somaǵa 101 myńnan astam MRT qyzmeti kórsetildi.

Sonymen qatar, qańtar men maýsym aralyǵynda 3 mln-nan astam stomatologııa, 2 mln-ǵa jýyq rentgen jáne 1,6 mln-nan astam ÝDZ-dıagnostıka qyzmetteri kórsetildi, olardyń jalpy quny 15 mlrd teńgeden asady. Olardyń barlyǵy MÁMS paketinde medıtsınalyq saqtandyrý qarajaty esebinen kórsetildi, patsıentterge medıtsınalyq kómek úshin Qor aqy tóledi.

Aıta ketsek, birinshi jartyjyldyqta barlyq qazaqstandyqtar MÁMS júıesinde shartty túrde saqtandyrylǵan jáne medıtsınalyq qyzmetterdi kepildi kómek aıasynda, sondaı-aq MÁMS aıasynda paıdalana alatyn.