Medıtsınalyq saqtandyrý qoryna astanalyqtardan shaǵym nege kóp túsken

ASTANA. QazAqparat – Mindetti áleýmettik medıtsınalyq saqtandyrý qory Astana qalalyq fılıalynyń dırektory Nurlybek Qabdyqaparov byltyr qala turǵyndarynan shaǵym nege kóp túskenin túsindirdi, dep habarlaıdy QazAqparat tilshisi.

«2022 jyly Medıtsınalyq saqtandyrý qorynyń Astana qalasy boıynsha fılıalynda 4 348 shaǵym tirkeldi, onyń 1 034-in (26%) aryz berýshilerdiń ózderi keri qaıtaryp aldy, 3 216 aryz qaraldy.

Azamattardyń ótinishterin tirkeý kezinde keıbireýler «shaǵym» sanatyn tańdaıdy, degenmen suraqtar kóp jaǵdaıda keńes alý sıpatynda bolady. Mindetti medıtsınalyq saqtandyrý jarnalaryn múlde tólemegen nemese turaqty tólemegen jaǵdaıdaǵy saqtandyrý mártebesine qatysty suraqtar da bar. Sondaı-aq, medıtsınalyq uıymdarǵa habarlasa almaý sııaqty shaǵymdar boldy. Mundaı jaǵdaılarda Medıtsınalyq saqtandyrý qory ótinish berýshilerge tikeleı jaýap beredi, biraq Qordyń «shaǵymdar» sanatynan «keńes alý» sanatyna ózgertýge tehnıkalyq múmkindigi joq. Sondyqtan, shaǵymdar sany jasandy túrde kóbeıedi», - dedi ol.

Aıtýynsha, shaǵym boıynsha týyndaǵan máseleniń 50%-dan astamy shaǵym túsken kúni-aq sheshiledi.

«Óıtkeni, Qor ókilderi únemi emdelýshilerdiń quqyqtaryn qorǵaıdy jáne árbir ótinishti medıtsınalyq uıymdardyń patsıentterdi qoldaý qyzmetimen birge qarastyryp, patsıenttiń máselesin sol sátte sheshedi», - dedi Nurlybek Qabdyqaparov.