Medıtsınalyq saqtandyrý qoryna 8,17 mlrd teńgege jýyq qarjy tústi

ASTANA. QazAqparat - Sáýir aıynda Medıtsınalyq saqtandyrý qoryna  8 mlrd 17 mln teńgege jýyq saqtandyrý jarnasy aýdaryldy. Bul týraly "Áleýmettik medıtsınalyq saqtandyrý qory" AQ baspasóz qyzmeti habarlady.

Keltirilgen derekterge qaraǵanda, saqtandyrý júıesi iske qosylǵan 2017 jyldyń 1 shildesinen 2018 jyldyń 30 sáýirine deıingi aralyqta jumys berýshiler men jeke kásipkerler tólegen jarna kólemi 63,3 mlrd teńgeni qurap otyr. Onyń ishinde, 54,9 mlrd teńge (87% jýyǵy) jumys berýshilerdiń qaramaǵyndaǵy qyzmetkerleri úshin jasaǵan tólemderi bolsa, qalǵan 8,4 mlrd teńge (13% jýyǵy) - jeke kásipkerler men azamattyq-quqyqtyq negizde eńbek etetin tulǵalarǵa tıesili.

Aımaqtar arasynda jarna tóleý jaǵynan Almaty jáne Astana qalalary, sondaı-aq, Qaraǵandy oblysy kósh bastap tur.

«Jınaqtalǵan jarna Ulttyq bankte saqtalady. Elimizdiń bas bankimen qarjyny senimgerlik basqarý týraly kelisim bekitilgen. Túsken qarajat MÁMS júıesi iske qosylǵannan keıin saqtandyrý sheńberinde kórsetiletin qyzmetter aqysyn tóleýge jumsalady» delingen baspasóz baıanynda.