Medıtsınalyq saqtandyrý qory jeke baılanys ortalyǵyn iske qosty
11:31, 03 Qyrkúıek 2019
ALMATY. QazAqparat - «Áleýmettik medıtsınalyq saqtandyrý qory» KEAQ jeke baılanys ortalyǵyn iske qosty. Budan bylaı turǵyndar saqtandyrý máselelerine qatysty saýaldaryn 1406 nómirine joldaı alady. Bul týraly qordyń Almaty qalalyq fılıaly habarlady.
Habarlamaǵa súıensek, baılanys ortalyǵyna Qazaqstan boıynsha kez-kelgen telefonnan tegin qońyraý shalýǵa bolady. Baılanys ortalyǵy jumys kúnderi saǵat tańǵy 9.00-den 18.30-ǵa deıin jumys isteıdi.
«Qor mamandaryna medıtsınalyq saqtandyrý, medıtsınalyq kómek kórsetý máseleleri jóninde saýal qoıýǵa bolady. Sonymen qatar, jurtshylyq kórsetilgen medıtsınalyq qyzmet sapasyna baǵa berip, aryz-shaǵymdaryn da joldaı alady», delingen habarlamada.
Jalpy, qor 2020 jyldan bastap barlyq aımaqtyq fılıaldarynda azamattardy qabyldaý kabınetterin ashýdy josparlap otyr. Qazirgi tańda mundaı kabınet medıtsınalyq saqtandyrý júıesin synaqtan ótkizip jatqan Qaraǵandy oblysynda jumys istep tur.