Medıtsınalyq saqtandyrý qory pandemııa kezinde mindetin tolyq oryndady - Basqarma tóraǵasy
«2020 jyl ózderińiz biletindeı, bárimizge, ásirese, elimizdiń densaýlyq saqtaý júıesi úshin qıyn boldy. Medıtsınalyq saqtandyrý júıesin júzege asyrý kezeńi koronavırýs pandemııasymen tuspa tus keldi. Qordyń negizgi mindeti medıtsınalyq uıymdardy úzdiksiz qarjylandyrý jáne KVI-men kúreske jumyldyrylǵan medıtsına qyzmetkerlerin materıaldyq qoldaý. Qor bul mindetti tolyq oryndady», - deıdi Áleýmettik medıtsınalyq saqtandyrý qorynyń Basqarma tóraǵasy Bolat Tókejanov.
Onyń aıtýynsha, aýrýdyń kóbeıýine daıyndyq barysynda birneshe mańyzdy qadam jasalyp, iske asyryldy. Pandemııa kezinde alǵashqy medıtsınalyq-sanıtarlyq kómektiń róli kúsheıtildi: mobıldi toptar qurylyp, úıdegi kúndizgi statsıonarlar uıymdastyryldy jáne medıtsınalyq qyzmet qashyqtan formatta kórsetile bastady.
«Sonymen qatar, PTR dıagnostıkasy boıynsha zerthanalyq qyzmettiń múmkindigi artty. Qor medıtsınalyq kómektiń medıtsınalyq saqtandyrý júıesine qatysý-qatyspaýyna qaramastan búkil halyqtyń osy kómekke qol jetimdiligin qamtamasyz etti. Fors majorlyq jaǵdaılarǵa qaramastan, mindetti medıtsınalyq saqtandyrýdy engizýdiń birinshi jylynyń nátıjeleri medıtsınalyq saqtandyrý júıesiniń tolyq jumys isteıtindigin kórsetti. Ol densaýlyq saqtaý júıesine 500 mıllıardtan astam teńge quıýǵa múmkindik berdi. Osy qarajat esebinen medıtsınalyq qyzmetterdiń – sırek kezdesetin sala mamandarynyń keńesteri, dıagnostıka, tekserýler, kúndizgi statsıonar qyzmetiniń kólemi edáýir ósti. Endi bizde joǵary tehnologııalyq operatsııalardy qarjylandyrýǵa jáne medıtsınalyq qyzmettiń osy túrine kezekti azaıtýǵa múmkindik bar», - deıdi ol.