Medıtsınalyq saqtandyrý qory koronavırýs pen pnevmonııaǵa qarsy 159 mlrd teńge bóldi

NUR-SULTAN. QazAqparat – Áleýmettik medıtsınalyq saqtandyrý qory koronavırýspen jáne pnevmonııamen kúres boıynsha is-sharalardy 159 mlrd teńgeden astam somaǵa qarjylandyrýdy kózdep otyr. Bul týraly atalǵan qordyń basqarma tóraǵasy Bolat Tókejanov málim etti, dep habarlaıdy QazAqparat tilshisi.

«Koronavırýs ınfektsııasyn emdeýge baılanysty Tegin medıtsınalyq kómektiń kepildik berilgen kólemi (TMKKK) jáne Mindetti áleýmettik medıtsınalyq saqtandyrý (MÁMS) paketterine ózgerister engizildi. COVID -19-ǵa shaldyqqan patsıentterge jáne COVID-19 indetine kúdikti jaǵdaıda mobıldi brıgada men statsıonarlyq qyzmet úıde kórsetiledi. Bul qyzmetter saqtandyrý mártebesine qaramastan barlyq qazaqstandyqqa arnalǵan. Qazirgi epıdemıologııalyq jaǵdaıdy eskere otyryp, TMKKK paketinde «baılanysta bolǵan adamdardy, bakterııa men vırýs tasymaldaýshylardy jáne ınfektsııalyq aýrýǵa kúdikti adamdardy oqshaýlaý boıynsha» qyzmetter kózdelgen», - dedi Tókejanov Ortalyq kommýnıkatsııalar qyzmetinde.

Onyń sózine qaraǵanda, bul ózgerister saqtandyrý mártebesine qaramastan, áleýmettik mańyzy bar aýrýǵa shaldyqqandarǵa medıtsınalyq kómekti qoljetimdi etýge múmkindik beredi. Bul ásirese kúzde ınfektsııanyń yqtımal jańa tolqyny kezinde ózekti.

«Qazir Qor tarapynan koronavırýs pen pnevmonııaǵa qarsy kúres boıynsha is-sharalardy qarylandyrý úshin 159 mlrd teńgeden astam qarjy qarastyrylǵan. Onyń ishinde koronavırýspen aýyratyn naýqastardy emdeýge – 50,5 mlrd teńge, epıdemııaǵa qarsy sharalarǵa tartylǵan medıtsına qyzmetkerlerine ústemaqyǵa - 91,9 mlrd teńge, statsıonarlyq deńgeıdegi PTR-zertteýge – 4,2 mlrd teńge, úıdegi statsıonarda qyzmet kórsetýge – 0,4 mlrd teńge, ambýlatorııalyq deńgeıdegi PTR- ǵa - 10 mlrd teńge, mobıldi brıgadalardyń jumysyna - 2,4 mlrd teńge beriledi», - dep naqtylady basqarma tóraǵasy.