Medıtsınalyq saqtandyrý: Qate nemese artyq tólengen aqshany qaıtarýǵa bola ma

ALMATY. QazAqparat - Mindetti áleýmettik medıtsınalyq saqtandyrý júıesi 2020 jyldyń basynda tolyqqandy iske qosylǵan bolatyn. Saqtandyrý júıesine qate nemese artyq tólengen jarnalardy qaıtaryp alýǵa bolady. Bul suraqqa «Áleýmettik medıtsınalyq saqtandyrý qory» KEAQ Almaty qalalyq fılıaly jaýap berdi, dep habarlaıdy QazAqparat tilshisi.

«Artyq tólengen aqshany qaıtaryp alý úshin «Azamattarǵa arnalǵan úkimet» memlekettik korporatsııasyna «tólemdi qaıtarý týraly» ótinish jazý qajet. Tólem jasalǵanyn rastaıtyn qujattar (standartty anyqtama nemese tólem qujatynyń kóshirmesi) ótinishke qosa jiberiledi. Memlekettik korporatsııa aryzdy kelip túsken kúnnen bastap 5 jumys kúni ishinde tekserip, jarna mólsherin, ósimaqy bar-joǵyn anyqtaıdy.

Sodan soń ótinish tólem rekvızıtterimen birge Medıtsınalyq saqtandyrý qoryna jiberiledi. Qor artyq nemese qate tólengen aqshany jeti operatsııalyq kún ishinde Memlekettik korporatsııanyń esep-shotyna aýdarady. Qarjy qaıtarylmaıtyn bolsa, onyń sebebin túsindiretin málimetterdi joldaıdy», - dedi qor fılıalynan.

Málim etilgendeı, qarjy myna jaǵdaılarda qaıtarylady:

- qate aýdarylǵanda;

- artyq tólengende;

- tólemniń maqsatty kody qate kórsetilse;

- MT 102 formatyndaǵy tólem qujatynda qate ketken jaǵdaıda;
- tóleýshiniń rekvızıtteri durys kórsetilmese;
- tóleýshi nemese bank qarjyny birneshe ret aýdaryp jiberse.

Aıta keteıik, qazirgi tańda saqtandyrý tólemderi jaıly málimetti «elektrondy úkimettiń» egov.kz portaly arqyly alýǵa bolady. Ol úshin Elektrondy tsıfrlyq qoltańba qajet. Tsıfrlyq qoltańbasy bar kez kelgen azamat «jeke kabınetke» kirip, MÁMS tólemderiniń qashan jasalǵanyn bile alady.