Medıtsınalyq saqtandyrý: 486 myńnan astam kemshilik anyqtaldy
Monıtorıng nátıjeleri boıynsha 2021 jyldyń 6 aıynda Qor sarapshylary 486 myńnan astam kemshlilikterdi (deffekt) anyqtady. Salystyra qaraǵanda, ótken jyldyń І jartyjyldyǵynyń qorytyndysy boıynsha bul kórsetkish 461 myń bolǵan.
Burmalaý áráketteriniń basym bóligin (74,4%) mamandar halyqqa konsýltatsııalyq-dıagnostıkalyq qyzmetter kórsetý boıynsha anyqtady. Budan ári, sarapshylardyń derekterine súıensek, kómek/qyzmetter kóleminiń negizsiz artýy - 67,0%, emdeý-dıagnostıkalyq is-sharalardyń standarttardan, densaýlyq saqtaý salasyndaǵy erejelerden/klınıkalyq hattamalardan negizsiz aýytqý faktileri - 16,4%, medıtsınalyq qujattamany durys resimdemeý -11,3%, osy sekildi kemshilikterge jol berilgen.
Sondaı-aq, osy jarty jyl ishinde 11,3 myńnan astam medıtsınalyq qyzmet kórsetý jaǵdaıy rastalmaǵany anyqtaldy, bul anyqtalǵan burmalaýshylyqtardyń jalpy sanynyń 2,3%-yn quraıdy. Óńirler arasynda «jazbalar» kóbinese Nur-Sultan, Shymkent qalalarynda jáne Jambyl oblysynda, eń azy BQO, Atyraý, Qostanaı jáne Aqmola oblystarynda kezdesedi.
«Quqyq buzýshylarǵa» qatysty barlyq densaýlyq saqtaý sýbektilerine aıyppul sanktsııalary qoldanyldy.
Medıtsınalyq uıymdardyń kórsetiletin qyzmetterdiń qoljetimdiligi men sapasyna qatysty mindettemeleri sharttyq qatynastardyń mańyzdy bóligi jáne Qor olardyń oryndalýyn talap etýge quqyly. Aıta keteıik, osy jyldan bastap Qor proaktıvti monıtorıng júrgizý tájirıbesin engizdi, ıaǵnı qyzmet jetkizýshiniń sharttyq mindettemelerin oryndamaý faktileri anyqtalǵan kezde, olardy joıýǵa-túzetýge, tıisinshe oryndaýǵa qorytyndyǵa qol qoıylǵan kúnnen bastap 45 kúntizbelik kún beriledi. Eger kemshilikter merziminde túzetilmese, medıtsınalyq uıymǵa aıyppul salynady.
Eger patsıent ózi almaǵan qyzmettiń jazylý faktisin óz betinshe anyqtasa, ol týraly Medıtsınalyq saqtandyrý qoryna habarlaý qajet. Shaǵym nemese ótinish berý úshin 1406 telefonyna nemese Qoldau 24/7 mobıldi qosymshasy arqyly habarlasýǵa bolady.