Medıtsınalyq qyzmet úshin kimderden qosymsha qarajat talap etilmeıdi

NUR-SULTAN. QazAqparat - Qazirgi ýaqytta MÁMS arqyly bıýdjet kólemi 1,6 trıllıonǵa deıin artyp otyr. Bul týraly Ortalyq kommýnıkatsııalar ortalyǵynda ótken brıfıngte QR Densaýlyq saqtaý vıtse-mınıstri Oljas Ábishev málim etti, dep habarlaıdy QazAqparat tilshisi.

«Biz 1 qańtardan bastap mindetti áleýmettik medıtsınalyq saqtandyrý jobasyn iske asyra bastadyq. Bul jobanyń artyqshylyǵy - azamattar eki paketti: memleket tarapynan kepildendirilgen saqtandyrýdy jáne qosymsha Mindetti áleýmettik medıtsınalyq saqtandyrýdy (MÁMS) qoldana alady. Kóptegen azamattan »Eger men saqtandyrylmaǵan bolsam qajet jaǵdaıda medıtsınalyq mekeme medıtsınalyq kómek kórsetpeı me?« degen suraq qoıylyp jatady. Bul aqparat tolyǵymen durys emes, sebebi bizde joǵaryda atap ótkendeı eki paket te qoldanylady», - deıdi Oljas Ábishev.

Onyń aıtýynsha, buryn medıtsınalyq qyzmetter tiziminiń bıýdjeti 1 trıllıonǵa jetetin bolsa, qazirgi ýaqytta MÁMS arqyly bıýdjet kólemi 1,6 trıllıonǵa deıin artyp otyr.

«Eger mindetti áleýmettik medıtsınalyq saqtandyrylǵan bolsańyz ońaltý, dıagnostıka jasaý, profılaktıka, MRT sııaqty qosymsha medıtsınalyq qyzmet úshin qarajat talap etilmeıdi», - deıdi ol.