Medıtsınalyq qaldyqtardy kádege jaratý erekshe baqylaýǵa alynýy kerek - depýtat

NUR-SULTAN. QazAqparat – Májilistiń jalpy otyrysynda depýtat Dúısenbaı Turǵanov medıtsınalyq qaldyqtardy jınaýdy retke keltirý kerektigin aıtty. Bul qazaqstandyqtardyń densaýlyǵy men qorshaǵan ortaǵa aıtarlyqtaı qaýip tóndiredi.

Bul týraly májilismen elimizdiń Premer-Mınıstriniń birinshi orynbasary Roman Sklıardyń atyna joldaǵan depýtattyq saýalynda kóterdi, dep habarlaıdy QazAqparat tilshisi.

D.Turǵanovtyń aıtýynsha, medıtsınalyq qaldyqtardyń ósý problemasy, ásirese, búginde koronavırýs pandemııasy kezinde elimiz úshin óte ózekti. Medıtsına qaldyqtarymen durys jumys istemeý halyqtyń densaýlyǵyna qaýip týdyrady. Bir ret qoldanylatyn shprıtsterdi, tamyzǵyshtardy, tańǵyshtardy dezınfektsııalaý rejıminiń buzylýyna baılanysty dezınfektsııalanbaǵan qaldyq medıtsına mekemeleriniń qoqys konteınerlerine tastalady. Bul odan ári ártúrli ınfektsııalardyń paıda bolý jáne taralý qaýpin týdyrady.

Sonymen qatar, depýtat medıtsına qaldyqtaryn óńdeý jáne kádege jaratý qorshaǵan ortaǵa patogendi nemese ýly lastaýshy zattardy shyǵarý arqyly janama túrde densaýlyqqa qaýip tóndirýi múmkin ekenin aıtty.

D.Turǵanovtyń sózine qaraǵanda, Densaýlyq saqtaý, Ekologııa, geologııa jáne tabıǵı resýrstar mınıstrlikteri tarapynan jasalyp jatqan sharalar jetkiliksiz ekeni anyq. Atap aıtqanda, sapasyz kádege jaratý sebepteriniń biri atalǵan qyzmetterdi lıtsenzııalaýǵa jatatyn qyzmet túrleriniń tizbesinen alyp tastaýǵa qatysty bolyp otyr. Alaıda mınıstrlik áli de zańnamaǵa tıisti ózgerister engizýge bastama kótergen joq.

Onyń paıymynsha, mundaı kásiporyndarǵa Ekologııalyq kodekske sáıkes belgili bir talaptar qoıylýy tıis.

«Bul talaptar oryndalyp jatyr ma, ony kim baqylaıdy ? Qaıta óńdeý qyzmetin usynatyn kompanııalarda tıisti qondyrǵylar bar ma jáne olar qajetti talaptarǵa saı ma ? Medıtsına qaldyqtaryn kádege jaratý erejelerin buzǵany úshin qoldanylatyn jazalar qanshalyqty tıimdi ?» – dep surady depýtat.

Dúısenbaı Turǵanov osyǵan baılanysty medıtsına qaldyqtaryn kádege jaratý boıynsha qyzmet kórsetetin kásiporyndardyń qyzmetine baqylaýdy kúsheıtý, naqty standarttar ázirleý arqyly qajetti qural-jabdyqtardy kádege jaratý boıynsha qyzmet kórsetetin kásiporyndarǵa qoıylatyn talaptardy kúsheıtý, sondaı-aq qajetti qujattardy ázirleý qajet dep sanaıdy.