Medıtsınalyq bilim granttarynyń sany 5 myńǵa deıin kóbeıtiledi

NUR-SULTAN. QazAqparat – Medıtsınalyq oqý granttarynyń sany 5 myńǵa deıin kóbeıtiledi. Bul jóninde QR Densaýlyq saqtaý mınıstri Ajar Ǵınııat Senattyń baspasóz alańynda aıtty, dep habarlaıdy QazAqparat tilshisi.

«Búgingi tańda respýblıkada 70 myńnan astam dáriger jumys isteıdi. Búkil óńirlerden 3900-den astam dáriger kerek degen usynys bar. Jylyna 6000-nan astam dáriger, sonyń ishinde 2000-nan astam kópbeıindi dáriger daıarlanady. Osy 3900 dárigerdiń ishinde 2000-y — alǵashqy medıtsınalyq kómek kórsetetin ýchaskelik dárigerler. Jalpy praktıkalyq dárigerlerge suranys kóp. Olardyń jartysynan kóbi aýyldyq eldi mekenderge qajet», - dedi vedomstvo basshysy jýrnalısterdiń saýalyna bergen jaýabynda.

Mınıstr ásirese qandaı mamandar tapshy ekenin atap ótti.

«Sonymen qatar statsıonarlarda jumys isteıtin anestezıolog, reanımatolog dárigerler, akýsher-gınekolog deıtin dárigerlerge, pedıatrııa salasynda neonatologterge suranys kóp», - dedi Ajar Ǵınııat.

Sondaı-aq, ol bul tapshylyqty azaıtý úshin qandaı sharalar qolǵa alynǵanynan aqpar berdi.

«Mınıstrlik jyl saıyn bıýdjetten grantpen oqıtyndardyń sanyn kóbeıtip otyr. «Deni saý ult» ulttyq jobasy boıynsha jyl saıyn granttyń sany kóterilip, 5000-ǵa deıin jetkiziledi. Qazir onyń sany 4500-den joǵary.

Sonymen birge ákimdikter ózderi grant bólip otyr. Keıingi kezde keıbir medıtsınalyq uıymdar óz emhanalaryna óz qarajaty esebinen qajet mamandardy rezentýrada daıyndata bastady», - dedi mınıstr.

Aıta keteıik, búgin Senattyń jalpy otyrysynda «Qazaqstan Respýblıkasynyń bıologııalyq qaýipsizdigi týraly» Qazaqstan Zańy qabyldandy .